અમદાવાદ : શહેરના હાર્દ સમા એસ.જી. હાઈવે પર ફરી એકવાર ગંભીર અકસ્માત સર્જાયો હોવાની માહિતી સામે આવી રહી છે. આ વખતે પકવાન ચાર રસ્તાથી ગુરુદ્વારા વચ્ચેના બ્રિજ વિસ્તારમાં વહેલી સવારે એક ભયાનક અકસ્માત સર્જાયો હતો, જેમાં બે લક્ઝરી SUV અને કાર વચ્ચે જોરદાર ટક્કર થતાં અફરાતફરી મચી ગઈ હતી.આજે વહેલી સવારે પકવાન બ્રિજ ઉતરતી વખતે એક મહિન્દ્રા સ્કોર્પિયો SUV ચાલકે અચાનક બ્રેક મારી હતી. આ દરમિયાન પાછળથી પૂરપાટ ઝડપે આવી રહેલી કિયા કાર તેની સાથે ધડાકાભેર અથડાઈ ગઈ હતી.
આ અકસ્માતની ઘટનાના પ્રાથમિક માહિતી મુજબ, અમદાવાદ સરખેજ-ગાંધીનગર હાઈવે (એસ.જી. હાઈવે) પર સ્કોર્પિયો કાર નંબર GJ.01.WZ.0395 અને હરિયાણા પાર્સિંગ કિયા સેલ્ટોસ કાર નંબર HR.70G.7843નો પકવાન ચોકડીથી ગુરુદ્વારા બ્રિજ નજીક આજે વહેલી સવારે આ ગમખ્વાર અકસ્માત સર્જાયો હતો. જેમાં કિયા સેલ્ટોસ કારના આગળના ભાગનો બૂકડો બોલી ગયો છે, જ્યારે સ્કોર્પિયો કારના પાછળના ભાગનો કચ્ચરઘાણ નીકળી ગયો છે.
ઘટના બાદ રોડ પર વાહનચાલકોના ટોળા ઘટનાસ્થળે એકઠા થઈ ગયા હતા અને વાહન વ્યવહાર થંભી ગયો હતો, બાદમાં ઘટનાસ્થળે હાજર લોકોએ તપાસ કરતા કિયા સેલ્ટોસ કારની એર બેગ ખુલેલી હાલતમાં જોવા મળી હતી. જેથી કિયા કાર ચાલકનો આ અકસ્માતની ઘટનામાં આબાદ બચાવ થયો હોવાનું હાલ સામે આવ્યું છે. જ્યારે સ્કોર્પિયો કારના ચાલકને પણ કોઈ મોટી ઈજાઓ પહોંચી નહીં હોવાની વિગતો મળી રહી છે.
ઘટનાની જાણ થતા જ સ્થાનિક પોલીસ પણ ઘટનાસ્થળે પહોંચી હતી ત્યારે પ્રાથમિક તપાસમાં સ્કોર્પિયો કાર GJ.01.WZ.0395ના ચાલકે અચાનક બ્રેક મારતા આ અકસ્માતની ઘટના સર્જાઈ હોવાનું સામે આવી રહ્યું છે. પકવાન બ્રિજ ઉતરતા સમયે સ્કોર્પિયો કાર ચાલકે અચાનક બ્રેક મારતા પાછળથી આવી રહેલી HR.70G.7843 નંબરની કિયા સેલ્ટોસ કાર ધડાકાભેર અથડાઈ હતી. સાથે ઘટના બાદ પોલીસે અકસ્માતગ્રસ્ત બંને કારોને રોડ પરથી હટાવી ફરીથી વાહનવ્યવહાર શરૂ કરાવીને આ અંગે આગળની કાયદેસરની કાર્યવાહી હાથ ધરી હોવાની માહિતી હાલ સામે આવી રહી છે.