અમદાવાદ : વધતા જતા વાહનવ્યવહાર અને માર્ગ અકસ્માતોની સંખ્યાને ધ્યાને રાખીને, ટ્રાફિક નિયમો પ્રત્યે જાગૃતિ લાવવા માટે આઈસીઆઈસીઆઈ લોમ્બર્ડ (ICICI Lombard) દ્વારા સ્થાપિત ‘પ્રભાવ ફાઉન્ડેશન’ દ્વારા એક સરાહનીય પહેલ કરવામાં આવી હતી. તારીખ 26/02/2026, ગુરુવારના રોજ નવા વાડજ સ્થિત ‘અક્ષર પ્રાથમિક શાળા’ ખાતે ટ્રાફિક અવેરનેસ કેમ્પનું સુંદર આયોજન કરવામાં આવ્યું હતું.
‘પ્રભાવ ફાઉન્ડેશન’ દ્વારા યોજાયેલ આ શિબિરમાં મુખ્ય વક્તા તરીકે જયપ્રકાશભાઈ પટેલ અને પૂર્વીબેન જોશી ઉપસ્થિત રહ્યા હતા. તેમણે હાજર રહેલા વાલીઓ અને વિદ્યાર્થીઓને ટ્રાફિકના નિયમોનું પાલન કરવું શા માટે અનિવાર્ય છે, તે વિશે ખૂબ જ સરળ અને પ્રભાવશાળી રીતે સમજૂતી આપી હતી. માર્ગ સલામતી અંગેના મહત્વના સૂચનો આપતા તેમણે જણાવ્યું હતું કે, ટ્રાફિક શિસ્ત માત્ર દંડથી બચવા માટે નહીં, પરંતુ અમૂલ્ય માનવ જીવન બચાવવા માટે જરૂરી છે.
કાર્યક્રમના અંતે ‘પ્રભાવ ફાઉન્ડેશન’ દ્વારા એક ઉમદા કાર્ય કરવામાં આવ્યું હતું. કાર્યક્રમમાં ઉપસ્થિત તમામ વાલીઓ, બાળકો અને શિક્ષકોને સુરક્ષાના ભાગરૂપે ‘સ્ટીલબર્ટ’ (Steelbird) કંપનીના ઉચ્ચ ગુણવત્તાયુક્ત હેલ્મેટ ભેટ તરીકે આપવામાં આવ્યા હતા. સંસ્થાની આ પહેલને ઉપસ્થિત સૌ કોઈએ વધાવી લીધી હતી.
આજના સમયમાં જ્યારે રસ્તાઓ પર ટ્રાફિકનું ભારણ વધી રહ્યું છે, ત્યારે આવી જાગૃતિ શિબિરો પ્રજામાં સભાનતા કેળવવા માટે અત્યંત અનિવાર્ય છે. પ્રભાવ ફાઉન્ડેશન અને અક્ષર પ્રાથમિક શાળાના આ સંયુક્ત પ્રયાસને મિર્ચી ન્યૂઝ પરિવાર બિરદાવે છે. સમાજમાં સુરક્ષા અને નિયમન જળવાઈ રહે તે માટે આવા કાર્યક્રમો સતત થતા રહે તેવી મિર્ચી ન્યૂઝ પરિવારની અનેકગણી શુભકામનાઓ.