અમદાવાદ : અમદાવાદ મ્યુનિસિપલ કોર્પોરેશન દ્વારા છેલ્લાં બે વર્ષથી ભારતીય સંસ્કૃતિમાં ઉજવતાં હોળીકા દહનનાં પર્વને વૈદિક હોળીને વધુ પ્રોત્સાહન આપવામાં આવ્યું છે. ત્યારે ગાયનાં છાણમાંથી બનતી સ્ટીક અને છાણાનો હોળીકા દહનમાં ઉપયોગ કરવા માટે વૈદિક હોળીની કીટ તૈયાર કરવામાં આવી હતી. એક જ અઠવાડિયામાં મ્યુનિસિપલ કોર્પોરેશનને વૈદિક હોળી માટેની કીટનો અદભુત પ્રતિસાદ મળ્યો છે.
પ્રાપ્ત રિપોર્ટ મુજબ, અમદાવાદ મ્યુનિસિપલ કોર્પોરેશન દ્વારા ગાયના છાણમાંથી બનાવેલ સ્ટીક,ટીકકી ,છાણની પ્રોડકટસ,પુજા સામગ્રી સાથેની કીટ તૈયાર કરવામા આવી છે.હોળી પર્વ દરમિયાન લાકડાનો ઉપયોગ ઘટે એ માટે તંત્ર તરફથી કરવામા આવેલી પહેલ દરમિયાન એક સપ્તાહમાં 101 કીટની તૈયારી સામે 131 શહેરીજનો દ્વારા ઓનલાઈન રુપિયા 2500 ના ટોકન ઉપરાંત ગૌ સેવા ડોનેશન સાથે રુપિયા 3.27 લાખ આપવામા આવ્યા હતા.તંત્રની ધારણા કરતા પણ વધુ બુકીંગ આવતા કીટ માટે નવા ઓર્ડર લેવાનુ બંધ કરવુ પડયુ હતુ.
CNCD વિભાગના વડા નરેશ રાજપૂતે જણાવ્યું હતું કે,એક જ અઠવાડિયામાં મ્યુનિસિપલ કોર્પોરેશનને વૈદિક હોળી માટેની કીટનો અદભુત પ્રતિસાદ મળ્યો છે. સૌથી વધારે બુકિંગ શહેરના પશ્ચિમ વિસ્તારમાં થલતેજ, બોપલ, ઘુમા, શીલજ, ઘાટલોડિયા, વસ્ત્રાપુર ચાંદલોડિયા અને ગોતા જેવા વિસ્તારમાંથી મળ્યા છે. તેમને આજે આપવાની શરૂઆત કરી છે. રવિવાર સુધીમાં તમામ સોસાયટીઓમાં આ વૈદીક હોળીની કીટ પહોંચી જશે.
અમદાવાદ મ્યુનિસિપલ કોર્પોરેશન દ્વારા છેલ્લાં બે વર્ષથી ભારતીય સંસ્કૃતિમાં ઉજવતાં હોળીકા દહનનાં પર્વને વૈદિક હોળીનાં કોન્સેપ્ટ તરીકે વધુને વધુ પ્રોત્સાહન આપવાનાં પ્રયત્નો કરવામાં આવ્યા છે. ગાયનાં છાણમાંથી બનતી સ્ટીક અને છાણાનો હોળીકા દહનમાં ઉપયોગ કરી કાર્બન ડાયોક્સાઇડ/કાર્બન ઉત્સર્જન ઘટાડી પર્યાવરણનું જતન કરી વાતાવરણની અશુદ્ધિઓને દૂર કરવામાં આવે છે.