અમદાવાદ: મહારાષ્ટ્રના શિરડી ખાતે 28 ફેબ્રુઆરી 2026ના રોજ યોજાયેલ નેશનલ ચેમ્પિયનશિપ ૨૦૨૬ માં અમદાવાદના ખેલાડીઓએ ગુજરાતનું નામ દેશભરમાં રોશન કર્યું છે. ડાન્સ સ્કેટ સ્પોર્ટ ફેડરેશન ઓફ ઇન્ડિયા દ્વારા આયોજિત આ પ્રતિષ્ઠિત સ્પર્ધામાં અમદાવાદના રાણીપ વિસ્તારમાં આવેલા પ્રહલાદ પટેલ સ્કેટિંગ રીંકના ચાર પ્રતિભાશાળી વિદ્યાર્થીઓએ ભાગ લઈ અસાધારણ દેખાવ કર્યો હતો.
મહારાષ્ટ્રના શિરડી ખાતે યોજાયેલ આ નેશનલ ચેમ્પિયનશિપમાં ગુજરાત તરફથી પ્રતિનિધિત્વ કરતા ચાર વિદ્યાર્થીઓએ પોતાની સ્કેટિંગ અને ડાન્સિંગ કૌશલ્યના સમન્વયથી પ્રેક્ષકો અને નિર્ણાયકોના દિલ જીતી લીધા હતા. આ ખેલાડીઓએ તમામ ઇવેન્ટ્સમાં મળીને કુલ 28 ગોલ્ડ મેડલ જીત્યા છે. વિજેતા ખેલાડીઓની વિગત નીચે મુજબ છે:
વિજેતા ખેલાડીઓ
યુગ પંચાલ, નવા વાડજ
દોનીકા નંદેરીયા, રાણીપ
તનય સુથાર, રાણીપ
દ્વિતી વ્યાસ, રાણીપ
આ ભવ્ય વિજય પાછળ તેમના કોચ બિરેન રાજગુરુની કઠિન મહેનત અને યોગ્ય માર્ગદર્શન રહેલું છે. નેશનલ સ્તરની આ સ્પર્ધા માટે કોચ દ્વારા વિદ્યાર્થીઓને ખાસ તૈયાર કરવામાં આવ્યા હતા. તેમની ટેકનિકલ કુશળતા અને સતત પ્રેક્ટિસને કારણે જ આટલી મોટી સંખ્યામાં ગોલ્ડ મેડલ મેળવવામાં સફળતા મળી છે.
ડાન્સ સ્કેટ સ્પોર્ટ ફેડરેશન ઓફ ઇન્ડિયા એ ભારતમાં ડાન્સ અને રોલર સ્કેટિંગના સંયોજનવાળી નવીન રમતને પ્રોત્સાહન આપતી અગ્રણી સંસ્થા છે. આ સંસ્થા ઓનલાઇન પસંદગી ટ્રાયલ્સ અને નેશનલ ચેમ્પિયનશિપ જેવી સ્પર્ધાઓ દ્વારા દેશભરના સ્કેટર અને ડાન્સર્સને પોતાની પ્રતિભા વિશ્વ સમક્ષ લાવવા માટે એક સક્ષમ મંચ પૂરું પાડે છે.
અમદાવાદના નવા વાડજ-રાણીપ વિસ્તારના આ ચારેય વિજેતાઓને સ્કેટિંગ એસોસિએશન અને સ્થાનિક રમતપ્રેમીઓ દ્વારા સોશિયલ મીડિયા અને રૂબરૂ મળીને અભિનંદન પાઠવવામાં આવી રહ્યા છે.