અમદાવાદ : અમદાવાદ શહેરમાં છેલ્લા કેટલાક સમયથી રીક્ષામાં બેસતા પેસેન્જરોની નજર ચૂકવી ચોરી થવાના બનાવો વધી રહ્યા હતા.ત્યારે રિક્ષામાં મુસાફરોને બેસાડી તેમની નજર ચૂકવી કિંમતી સામાનની ચોરી કરતી ગેંગને લોકલ ક્રાઈમ બ્રાંચ (LCB) ઝોન-1 દ્વારા ઝડપવામાં સફળતા મળી છે.પોલીસે આ ગેંગના ત્રણ સભ્યોની ધરપકડ કરી સોનાનું મંગળસૂત્ર અને ઓટો રીક્ષા સહિત કુલ રૂ. 1,30,000/- નો મુદ્દામાલ કબજે કર્યો છે.
રિપોર્ટ મુજબ, લોકલ ક્રાઈમ બ્રાંચ (LCB) ઝોન-1 ટીમને પેટ્રોલિંગ દરમિયાન પોલીસને મળેલી ખાનગી બાતમીના આધારે આરોપીઓને પકડી પાડવામાં આવ્યા હતા. આરોપીઓ રિક્ષામાં મુસાફર તરીકે બેસીને અન્ય મુસાફરોની નજર ચૂકવી તેમની કિંમતી વસ્તુઓ ચોરી લેતા હતા.પકડાયેલા આરોપીઓમાં પ્રતાપભાઈ સોલંકી (ઉંમર 20), રતીબેન ચુડાસમા (ઉંમર 60) અને ભાનુબેન ઉર્ફે કાંતાબેન ચુડાસમા (ઉંમર 50)નો સમાવેશ થાય છે. આ તમામ આરોપીઓ હાલ વાસણા, અમદાવાદ ખાતે રહે છે અને મૂળ રાજુલા, જી. અમરેલીના વતની છે. પોલીસે આરોપીઓ પાસેથી અંદાજે રૂ. 1.30 લાખનો મુદ્દામાલ કબજે કર્યો છે, જેમાં સોનાનું મંગળસૂત્ર (રૂ.1 લાખ) અને એક ઓટો રિક્ષા (રૂ. 30 હજાર)નો સમાવેશ થાય છે.
પોલીસ તપાસમાં બહાર આવ્યું છે કે, આ મામલે વાડજ પોલીસ સ્ટેશનમાં ગુનો નોંધાયો છે. પ્રતાપભાઈ અને રતીબેન અગાઉ ખોખરા પોલીસ સ્ટેશનમાં નોંધાયેલા ચોરીના ગુનામાં પણ સંડોવાયેલા છે.આરોપીઓ અગાઉ પણ સમાન પ્રકારના ગુનાઓમાં સંડોવાયેલા હોવાનું પોલીસ તપાસમાં સામે આવ્યું છે.આ સફળ કામગીરીમાં LCB ઝોન-1ના પોલીસ અધિકારીઓ અને સ્ટાફની મહત્વપૂર્ણ ભૂમિકા રહી હતી.