અમદાવાદ : શહેરના પૂર્વ અને પશ્ચિમ વિસ્તારોમાં આવેલી ગુજરાત હાઉસિંગ બોર્ડની વર્ષો જૂની વસાહતો માટે રીડેવલપમેન્ટના દ્વાર ખૂલ્યા છે. લાંબા સમયથી ખોરંભે પડેલી રીડેવલપમેન્ટની પ્રક્રિયામાં હવે ‘ગિફ્ટ મની‘એ વેગ આપ્યો છે. ડેવલપરો દ્વારા ડેવલપરો દ્વારા રહીશોને આર્થિક પ્રોત્સાહન પેટે રકમ ચૂકવવાની શરૂઆત થતાં જ રહેવાસીઓમાં અનેરો ઉત્સાહ જાેવા મળી રહ્યો છે.
શરૂઆતના તબક્કામાં ડેવલપરો દ્વારા “ગિફ્ટ મની” આપવા અંગે આનાકાની થતા અનેક પ્રોજેક્ટ અટકી ગયા હતા. પરંતુ છેલ્લા થોડા સમયથી પરિસ્થિતિ બદલાઈ રહી છે. ડેવલપરો હવે રહીશોને ગિફ્ટ મની આપતા થયા છે, જેના કારણે અટવાયેલા પ્રોજેક્ટોને ફરી ગતિ મળી છે.
તાજેતરમાં નારણપુરાની કેટલીક સોસાયટીઓમાં ગિફ્ટ મની તરીકે રૂ. 2 લાખથી લઈને રૂ. 5 લાખ સુધી આપવામાં આવી હોવાની ચર્ચા તેજ બની છે. આ સમાચારના પગલે શહેરના અન્ય વિસ્તારોમાં પણ અંદરખાને ગિફ્ટ મની રોકડ કે ચેક દ્વારા આપવામાં આવી રહી હોવાની ચર્ચાઓ ઉઠી છે. કેટલીક જગ્યાએ આ રકમ એક સાથે તો કેટલીક જગ્યાએ તબક્કાવાર આપવામાં આવતી હોવાનું જાણવા મળે છે.
રીડેવલપમેન્ટ પ્રક્રિયામાં ગિફ્ટ મની મહત્વપૂર્ણ ભૂમિકા ભજવી રહી છે. ખાસ કરીને મોટા બાંધકામ અને રહેવાસીઓની સંમતિ મેળવવા માટે આ રકમ એક મુખ્ય પરિબળ બની છે. ઘણા કેસોમાં ગિફ્ટ મની મળતા જ અટકેલા પ્રોજેક્ટ ફરી શરૂ થયા છે, જેના કારણે આગામી સમયમાં વધુ સોસાયટીઓ રીડેવલપમેન્ટ માટે આગળ આવે તેવી શક્યતા છે.
વિશેષજ્ઞોના મતે, આવી ગિફ્ટ મની સોસાયટી તૂટે તે પહેલાં જ મેળવી લેવી રહેવાસીઓ માટે લાભદાયી સાબિત થઈ શકે છે. સાથે જ, સરકાર જાે ટેન્ડર પ્રક્રિયામાં જ સોસાયટીની કેટેગરી, મકાનના કાર્પેટ એરિયા અને ભૌગોલિક પરિસ્થિતિ મુજબ મિનિમમ ગિફ્ટ મની નક્કી કરે, તો સમગ્ર પ્રક્રિયામાં પારદર્શિતા અને ઝડપ આવી શકે છે.
સૂચિત મિનિમમ ગિફ્ટ મની રકમો નીચે મુજબ હોઈ શકે છે:
ઈડબલ્યુએસ (EWS): રૂ. 5,00,000
એલઆઈજી (LIG): રૂ. 7,00,000
એમઆઈજી (MIG): રૂ. 11,00,000
એચઆઈજી (HIG): રૂ. 15,00,000
આ પ્રસ્તાવ અમલમાં આવે તો શહેરમાં રીડેવલપમેન્ટની પ્રક્રિયા વધુ વ્યવસ્થિત અને ઝડપી બની શકે તેવી આશા વ્યક્ત થઈ રહી છે.