અમદાવાદ : શહેરના વાડજ વિસ્તારમાં બનેલી ઘરફોડ ચોરીની ઘટનાનો ભેદ પોલીસ દ્વારા ગણતરીના કલાકોમાં ઉકેલી લેવાયો છે. વાડજ પોલીસ સ્ટેશનની સર્વેલન્સ ટીમે ઝડપી કામગીરી કરીને પાંચ આરોપીઓને રૂ.2.39 લાખના મુદ્દામાલ સાથે ઝડપી પાડ્યા છે.
રિપોર્ટ મુજબ, વાડજ પોલીસને મળેલી બાતમીના આધારે જેના આધારે વોચ ગોઠવીને ઉમેશ સુનીલભાઈ દંતાણી (ઉ.વ.23), સીમા ઉર્ફે સીમ્મો ઉમેશ દંતાણી (ઉ.વ.21), ચંદાબેન દેવીપુજક (ઉ.વ.35), રાધા ઉર્ફે ચુલબુલી (ઉ.વ.27) અને કાયદાના સંઘર્ષમાં આવેલ એક કિશોરને ઝડપી પાડવામાં આવ્યા હતા. આરોપીઓ અમદાવાદના અલગ-અલગ વિસ્તારોમાં રહેતા હોવાનું જાણવા મળ્યું છે.પકડાયેલા આરોપીઓ પાસેથી કુલ રૂ.2,39,092નો મુદ્દામાલ કબજે કરવામાં આવ્યો છે. જેમાં રોકડ રકમ, પીતળના વાસણો, કમ્પ્યુટર અને કેમેરાના વાયર, એસીની કોપર પાઇપ, કિંમતી ઘડિયાળો તથા સોનાનું બ્રેસલેટ સામેલ છે.
આ ગુનામાં મુખ્ય આરોપી ઉમેશ દંતાણી અગાઉ પણ ચોરીના ગુનામાં સંડોવાયેલ હોવાનું બહાર આવ્યું છે. ઉપરાંત પકડાયેલા કિશોર સામે પણ અગાઉ ગુનાહિત નોંધ છે.
આ કામગીરી પોલીસ સબ ઇન્સ્પેક્ટર ડી.જે. દેસાઈ અને તેમની ટીમ દ્વારા ઉચ્ચ અધિકારીઓના માર્ગદર્શન હેઠળ કરવામાં આવી હતી. પોલીસની આ ઝડપી અને પ્રશંસનીય કામગીરીથી વિસ્તારના નાગરિકોમાં સુરક્ષાની લાગણી મજબૂત બની છે.