અમદાવાદ : આરોગ્યસેવામાં આધુનિક ટેકનોલોજીનો વ્યાપ વધારવા અને ડિજિટલ પરિવર્તનને પ્રોત્સાહન આપવા માટે ઇન્ડિયન મેડિકલ એસોસિએશન (IMA) હેડક્વાર્ટર અને IMA ગુજરાત સ્ટેટ બ્રાન્ચના સંયુક્ત ઉપક્રમે અમદાવાદમાં “ડિજિટલ હેલ્થ માસ્ટરક્લાસ”નું આયોજન કરવામાં આવ્યું છે. આ કાર્યક્રમ 10 મે 2026ના રોજ આશ્રમ રોડ સ્થિત અમદાવાદ મેડિકલ એસોસિએશન હોલ ખાતે યોજાશે.
રિપોર્ટ મુજબ, “Digital Health – Now a Necessity: From Awareness to Accessible & Affordable Implementation” થીમ આધારિત આ માસ્ટરક્લાસનો મુખ્ય ઉદ્દેશ ડૉક્ટર્સ અને હેલ્થકેર સંસ્થાઓને Hospital Management Information Systems (HMIS) અને Electronic Medical Records (EMR) જેવી ડિજિટલ વ્યવસ્થાઓ અપનાવવા માટે પ્રોત્સાહિત કરવાનો છે.
આ વર્કશોપ દરમિયાન દર્દી સંભાળમાં ગુણવત્તા સુધારવા, કામગીરીમાં ઝડપ અને પારદર્શિતા વધારવા તેમજ આરોગ્ય સંસ્થાઓના આર્થિક પ્રદર્શનને મજબૂત બનાવવાના મુદ્દાઓ પર ચર્ચા થશે. સાથે સાથે National Accreditation Board for Hospitals & Healthcare Providers (NABH) ડિજિટલ હેલ્થ સ્ટાન્ડર્ડ્સ અંગે પણ માર્ગદર્શન આપવામાં આવશે.
કાર્યક્રમમાં રાષ્ટ્રીય સ્તરના નિષ્ણાતો ડો. નરેન્દ્ર સૈની અને ડો. નારાયણ પેન્ડસે ઉપસ્થિત રહીને ડિજિટલ હેલ્થ ક્ષેત્રના તાજેતરના ટ્રેન્ડ્સ અને અમલીકરણ અંગે માર્ગદર્શન આપશે.
આ પ્રસંગે અમદાવાદ મેડિકલ એસોસિએશનના પ્રમુખ ડો. જીગ્નેશ શાહે જણાવ્યું હતું કે ડિજિટલ ટ્રાન્સફોર્મેશન હવે આરોગ્યક્ષેત્ર માટે અનિવાર્ય બની ગયું છે અને આ પ્રકારના કાર્યક્રમો ડૉક્ટર્સને ભવિષ્ય માટે તૈયાર કરવામાં મદદરૂપ બનશે.
માનદ સચિવ ડો મૌલિક શેઠએ ખાસ કરીને નાના અને મધ્યમ હોસ્પિટલો માટે આ વર્કશોપને ઉપયોગી ગણાવ્યો અને જણાવ્યું કે ડિજિટલ સિસ્ટમ્સના અમલીકરણ માટે આ એક પ્રાયોગિક માર્ગદર્શિકા પૂરું પાડશે.
આ કાર્યક્રમ ખાસ કરીને ડૉક્ટર્સ, હોસ્પિટલ એડમિનિસ્ટ્રેટર્સ, મેડિકલ સુપરિન્ટેન્ડન્ટ્સ અને હેલ્થકેર લીડર્સને ધ્યાનમાં રાખીને તૈયાર કરવામાં આવ્યો છે. ભાગ લેવા માટે રજીસ્ટ્રેશન મફત છે, પરંતુ ફરજિયાત રાખવામાં આવ્યું છે.
કાર્યક્રમમાં મોટી સંખ્યામાં ડૉક્ટર્સ અને આરોગ્યક્ષેત્રના નિષ્ણાતોની હાજરી અપેક્ષિત છે.