અમદાવાદ : શહેરના સોલા વિસ્તારમાં ઈકો કારના સાયલેન્સરની ચોરીના બનાવોમાં સંડોવાયેલા આરોપીઓને સોલા હાઈકોર્ટ પોલીસ દ્વારા ઝડપી લેવામાં આવ્યા છે. પોલીસે રૂ.1,54,000/- નો મુદ્દામાલ સાથે આરોપીઓને પકડી ચાર અલગ-અલગ ગુનાઓનો ભેદ ઉકેલવામાં સફળતા મેળવી છે.
રિપોર્ટ મુજબ, પોલીસ સબ ઇન્સ્પેક્ટર એસ.જે. દેસાઈ અને સ્ટાફને મળેલી ચોક્કસ બાતમીના આધારે તેમજ CCTV ફૂટેજ અને ટેક્નિકલ સર્વેલન્સની મદદથી આલ્ફા શોપિંગ સેન્ટર નજીક જાહેર રોડ પરથી બે આરોપીઓને ઝડપવામાં આવ્યા હતા. તેમની પાસેથી ચોરી કરેલા 4 સાયલેન્સર કબ્જે કરવામાં આવ્યા હતા.
પકડાયેલા આરોપીઓમાં અસલમ ઉર્ફે ભયલ (ઉંમર 30, ધંધો-ડ્રાઈવિંગ) અને મહમંદ જુનેદ શેખ (ઉંમર 29, ધંધો-ગેરેજ કામ)નો સમાવેશ થાય છે. બંને ધોળકા વિસ્તારના રહેવાસી હોવાનું જાણવા મળ્યું છે.પોલીસે આરોપીઓ પાસેથી કુલ ₹1.54 લાખનો મુદ્દામાલ કબ્જે કર્યો છે, જેમાં 4 સાયલેન્સર અને એક સ્વિફ્ટ કારનો સમાવેશ થાય છે.
તપાસમાં સામે આવ્યું છે કે આરોપીઓ રાત્રિના સમયે પાર્ક કરેલી ઈકો કારમાંથી સાયલેન્સર ચોરી કરતા અને તેમાં રહેલા કિંમતી મેટલ (કેટેલિટિક કન્વર્ટર)ને ઊંચા ભાવે વેચતા હતા. તેઓ ચોરી કર્યા બાદ અન્ય સાયલેન્સર લગાવી જતા હોવાથી માલિકોને તરત જાણ થતી નહોતી.આ કામગીરીમાં સોલા હાઈકોર્ટ પોલીસ સ્ટેશનના સ્ટાફે મહત્વપૂર્ણ ભૂમિકા ભજવી છે અને પોલીસે વધુ તપાસ હાથ ધરી છે.