અમદાવાદ : અમદાવાદ શહેર ક્રાઇમ બ્રાન્ચે એક પ્રશંસનીય કામગીરી કરતા, વાડજ પોલીસ સ્ટેશનની કસ્ટડીમાંથી નાસી છૂટેલા પોક્સો (POCSO) ના ગુનાના આરોપીને ગણતરીના કલાકોમાં જ ઝડપી પાડ્યો છે. વધુ કાયદેસરની તપાસ અને કાર્યવાહી અર્થે તેને ફરીથી વાડજ પોલીસ સ્ટેશનને સોંપવાની તજવીજ હાથ ધરી છે.
રિપોર્ટ મુજબ, અમદાવાદના વાડજ પોલીસ સ્ટેશનમાં નોંધાયેલા પોસ્કોના ગુનામાં ધરપકડ કરાયેલો આરોપી પોલીસને ચકમો આપીને નાસી છૂટ્યો હતો.પોલીસ કસ્ટડીમાંથી ફરાર થવા બદલ તેની વિરુદ્ધ વાડજ પોલીસ સ્ટેશનમાં ભારતીય ન્યાય સંહિતાની કલમ-૨૬૨ મુજબ અલગથી ગુનો પણ નોંધવામાં આવ્યો હતો.
ઘટનાની ગંભીરતાને જોતા અમદાવાદ ક્રાઇમ બ્રાન્ચની અલગ-અલગ ટીમો કાર્યરત કરવામાં આવી હતી. ટેકનિકલ અને હ્યુમન ઇન્ટેલિજન્સના આધારે ક્રાઇમ બ્રાન્ચે સઘન તપાસ હાથ ધરી હતી, જેના પરિણામ સ્વરૂપ આરોપી અશોક ડાભાણીને ચંદ્રનગર બ્રીજ પાસેથી ઝડપી લેવામાં આવ્યો હતો.
ક્રાઇમ બ્રાન્ચે આરોપીનો કબજો મેળવી, વધુ કાયદેસરની તપાસ અને કાર્યવાહી અર્થે તેને ફરીથી વાડજ પોલીસ સ્ટેશનને સોંપવાની તજવીજ હાથ ધરી છે. કસ્ટડીમાંથી ફરાર થયેલા આરોપીને ટૂંક સમયમાં પકડી પાડી ક્રાઇમ બ્રાન્ચે પોતાની સતર્કતાનો પુરાવો આપ્યો છે.