અમદાવાદ : અમદાવાદ મહાનગરપાલિકામાં નવા મેયર અને અન્ય મહત્વના પદાધિકારીઓની નિમણૂક માટે હવે કાઉન્ટડાઉન શરૂ થઈ ગયું છે. અમદાવાદ મ્યુનિસિપલ કોર્પોરેશન (AMC) દ્વારા 26 મેના રોજ સવારે 11 વાગ્યે સામાન્ય સભા બોલાવવામાં આવી છે, જેમાં મેયર, ડેપ્યુટી મેયર અને સ્ટેન્ડિંગ કમિટીના ચેરમેનની સત્તાવાર જાહેરાત કરવામાં આવશે.
રિપોર્ટ મુજબ, શહેરના મેયર સહિતના પદાધિકારીઓની ચૂંટણી માટે 26મી મેએ મ્યુનિસિપલ કમિશનર દ્વારા સામાન્ય સભા બોલાવવામાં આવી છે. ભાજપ પાસે સ્પષ્ટ બહુમતી હોવાના કારણે તમામ પદાધિકારીઓની વરણી બિનહરીફ થવાની પૂરી શક્યતા છે. મેયર ઉપરાંત ડેપ્યુટી મેયર, સ્ટન્ડિંગ ચેરમેન સહિતના પદાધિકારીઓની વરણી કરાશે. AMTS કમિટીના ચેરમેનની પણ નિમણૂક કરવામાં આવનાર છે.
સાંજે કોર્પોરેશન દ્વારા સત્તાવાર એજન્ડા જાહેર કરવામાં આવશે, જેમાં ચૂંટણી પ્રક્રિયા અને વિવિધ પદોની નિમણૂક અંગેની વિગતો સામેલ રહેશે. સ્ટેન્ડિંગ કમિટીના ચેરમેન માટે 23 અથવા 24 મેના રોજ ઉમેદવારી જાહેર થવાની શક્યતા છે. અંદાજે 15 જેટલા દાવેદારો પોતાના નામ નોંધાવી શકે છે. માહિતી મુજબ, 26 મેના રોજ જ સ્ટેન્ડિંગ કમિટીની પ્રથમ બેઠક પણ યોજાઈ શકે છે. આ બેઠકમાં નવી કમિટીના 12 સભ્યો અંગે પણ સત્તાવાર જાહેરાત કરવામાં આવશે.
ઉલ્લેખનીય છે કે તાજેતરમાં યોજાયેલી સ્થાનિક સ્વરાજ્યની ચૂંટણીમાં ભાજપે (BJP) અમદાવાદ મહાનગરપાલિકામાં 160 બેઠકો સાથે ભવ્ય જીત મેળવી હતી. હવે શહેરના મેયર, ડેપ્યુટી મેયર, સ્ટેન્ડિંગ કમિટી ચેરમેન, શાસક પક્ષના નેતા અને દંડક કોણ બનશે તે અંગે રાજકીય ચર્ચાઓ તેજ બની છે.