અમદાવાદ : અમદાવાદમાં ડ્રગ્સ, હેરોઈન અને અન્ય નશીલા પદાર્થોની સાથે હાઇબ્રિડ ગાંજાનું ચલણ આશ્ચર્યજનક રીતે વધી રહ્યું છે.પોલીસની નજરથી બચવા માટે હવે પેડલરો લક્ઝરી કારનો સહારો લઈ રહ્યા છે. આવા જ એક હાઇપ્રોફાઇલ નેટવર્કનો પર્દાફાશ કરીને અમદાવાદ એસઓજી (SOG) ક્રાઇમની ટીમે વિજય ચાર રસ્તા નજીકથી એક મર્સિડીઝ કારમાંથી 69 લાખથી વધુની કિંમતના હાઇબ્રિડ ગાંજા સાથે એક પેડલરની ધરપકડ કરી છે.
રિપોર્ટ મુજબ, SOGના પોલીસ ઈન્સ્પેક્ટર ગોહિલ અને ભટ્ટને માહિતી મળી હતી કે રાજસ્થાનથી આવેલો હાઇબ્રિડ ગાંજો અમદાવાદમાં વેચવા માટે લાવવામાં આવ્યો છે જેથી પોલીસે વિજય ચાર રસ્તા પાસે હાર્દિક કલાલની અટકાયત કરી હતી. કારની તલાશી લેતા તેમાંથી 2 કિલોગ્રામ જેટલો ઉચ્ચ ગુણવત્તાનો હાઇબ્રિડ ગાંજો મળી આવ્યો હતો, જેની આંતરરાષ્ટ્રીય બજારમાં કિંમત 69 લાખથી વધુ અંકાય રહી છે. પોલીસ તપાસમાં ખુલ્યું છે કે આ લક્ઝરી કાર ભૂપેન્દ્ર પરમાર નામની વ્યક્તિની છે, જેની પાસેથી હાર્દિકે આર્થિક લેતીદેતીમાં કાર મેળવી હતી.
હાર્દિકની પ્રાથમિક પૂછપરછમાં ચોંકાવનારો ખુલાસો થયો છે કે આ રેકેટના તાર અમદાવાદ એરપોર્ટ સાથે જોડાયેલા છે. હાર્દિકને તેના સંબંધી પ્રદીપ કલાલના કહેવાથી એરપોર્ટની બહાર એક અજાણ્યા શખ્સ દ્વારા ટ્રોલી બેગમાં ગાંજાના કુલ 9 પેકેટ આપવામાં આવ્યા હતા. જેમાંથી 7 પેકેટ આપનાર વ્યક્તિ પરત લઈ ગયો હતો અને બાકીના 2 પેકેટ હાર્દિકને ડિલિવરી માટે અપાયા હતા. અગાઉ બોપલના અર્ચિત અગ્રવાલ અને લાલો સોની પણ આ જ રીતે મર્સિડીઝ કારમાં ડ્રગ્સ સપ્લાય કરતા પકડાયા હતા. આ જથ્થો કોણે મોકલ્યો અને શહેરમાં કોને આપવાનો હતો, તે દિશામાં એસઓજી વધુ તપાસ ચલાવી રહી છે.