અમદાવાદ : અમદાવાદના વાતાવરણમાં સોમવારે સાંજથી મોડી રાત સુધી અચાનક મોટો પલટો જોવા મળ્યો હતો. અસહ્ય ગરમી અને બફારા વચ્ચે અચાનક તીવ્ર પવન ફૂંકાવા લાગ્યો હતો અને જોતજોતામાં સમગ્ર વિસ્તાર ધૂળની ડમરીઓથી ઘેરાઈ ગયો હતો. આ અચાનક આવેલા મિનિ વાવાઝોડા જેવા માહોલને કારણે અફરાતફરી મચી ગઈ હતી અને લોકો પોતાના વાહનો થંભાવીને કે કામકાજ પડતું મૂકીને ઘર તરફ દોડતા જોવા મળ્યા હતા. જો કે, બાદમાં કેટલાક વિસ્તારમાં તૂટી પડયો હતો.
રિપોર્ટ મુજબ, અમદાવાદ શહેરના વાતાવરણમાં એકાએક પલટો આવતા પશ્ચિમ અને પૂર્વના અનેક વિસ્તારો ધૂળની ચાદર નીચે ઢંકાઈ ગયા હતા. ખાસ કરીને એસ.જી. હાઈવે, વસ્ત્રાપુર, આલ્ફા વન મૉલ, બોડકદેવ સહિતના આસપાસનો વિસ્તાર અને GIDC ગ્રાઉન્ડ ખાતે જોરદાર પવન સાથે ભયંકર આંધી આવી હતી. અમદાવાદ શહેરના જગતપુર, એસજી હાઇવે, રીંગ રોડ, ચાંદખેડા, મોટેરા, સાબરમતી, ગોતા સહિતના વિસ્તારોમાં ધોધમાર વરસાદ પડ્યો હતો. વરસાદના ઝાપટાંના કારણે કાળઝાળ ગરમીથી તોબા પોકારી ઉઠેલા નાગરિકોને મોટી રાહત મળી હતી અને સમગ્ર પંથકમાં ઠંડક પ્રસરી ગઈ હતી.
નિર્ણયનગર વિસ્તારમાં આવેલા સર્વેશ એપાર્ટમેન્ટ ખાતે ચાલી રહેલી ભાગવત કથાના કાર્યક્રમ દરમિયાન બનાવવામાં આવેલો મંડપ ભારે પવનના કારણે ધરાશાયી થયો હતો.ભારે પવનના કારણે નવરંગપુરા, ઓઢવ, સરસપુર વોરાના રોજા અને નિર્ણયનગર વિસ્તારમાં ઝાડ પડ્યા છે. અમદુપુરા પોલીસ લાઈન પાસે એક સ્ટ્રીટ લાઈટનો થાંભલો પડી જતા રોડ બંધ થઈ ગયો હતો. ફાયર બ્રિગેડની ટીમને જાણ કરવામાં આવતા સ્થળ પર પહોંચીને ઝાડને દૂર કરવાની કામગીરી કરવામાં આવી છે.
વસ્ત્રાપુર અને આસપાસના વિસ્તારોમાં લગભગ 10 મિનિટ સુધી ધૂળની ડમરીઓ એટલી તીવ્રતાથી ઉડી હતી કે રસ્તાઓ પર વિઝિબિલિટી નહિવત થઈ ગઈ હતી અને અંધકાર છવાઈ ગયો હતો. વાહનચાલકોને ભારે હાલાકીનો સામનો કરવો પડ્યો હતો અને વાહનો રોકી દેવાની ફરજ પડી હતી. જોકે, આ ભારે પવનને કારણે થોડી જ વારમાં વાતાવરણમાં ગરમી ગાયબ થઈ ગઈ હતી ત્યારબાદ વરસાદ શરૂ થતા ગુલાબી ઠંડક પ્રસરી ગઈ હતી.