અમદાવાદ શહેરમાં મિલકત સંબંધિત ગુનાઓને અટકાવવા અને ગુનેગારોને ઝડપી પાડવા માટે ચાલી રહેલી કાર્યવાહી દરમિયાન લોકલ ક્રાઇમ બ્રાન્ચ (એલસીબી) ઝોન-1ને મહત્વની સફળતા મળી છે. વસ્ત્રાપુર પોલીસ સ્ટેશન વિસ્તારમાંથી ચોરી થયેલી સ્પ્લેન્ડર પ્લસ મોટરસાયકલ સાથે એક રિઢા આરોપીની ધરપકડ કરવામાં આવી છે.
રિપોર્ટ મુજબ, ઝોન-1ના ડેપ્યુટી પોલીસ કમિશનર ડૉ. હર્ષદકુમાર પટેલના નિર્દેશનમાં એલસીબી ઝોન-1ની ટીમ પેટ્રોલિંગમાં હતી. આ દરમિયાન મળેલી બાતમીના આધારે પોલીસે વસ્ત્રાપુર વિસ્તારમાંથી રાજુ ઉર્ફે અબ્બો નાથુભાઈ કલાસવા (ઉંમર 27)ને ચોરીની મોટરસાયકલ સાથે ઝડપી પાડ્યો હતો.પોલીસ તપાસ દરમિયાન ઝડપાયેલી મોટરસાયકલ વસ્ત્રાપુર પોલીસ સ્ટેશનમાં નોંધાયેલા વાહન ચોરીના ગુનાની હોવાનું બહાર આવ્યું હતું. પોલીસે આરોપીની ધરપકડ કરી ગુનાનો ભેદ ઉકેલી લીધો છે. કબજે કરાયેલા મુદ્દામાલમાં અંદાજે રૂ. 25 હજાર કિંમતની સ્પ્લેન્ડર પ્લસ મોટરસાયકલનો સમાવેશ થાય છે.
પોલીસ તપાસમાં સામે આવ્યું છે કે આરોપી અગાઉ પણ ઘરફોડ ચોરી અને વાહન ચોરી સહિતના અનેક ગુનાઓમાં સંડોવાયેલો રહ્યો છે. તેની સામે અમદાવાદ સહિત વિવિધ પોલીસ સ્ટેશનોમાં ચોરી અને ઘરફોડના કુલ 10 જેટલા ગુનાઓ નોંધાયેલા છે.
આ કામગીરીમાં પો.સબ.ઇન્સ્પેક્ટર જી.કે. ચાવડા તથા એલસીબી ઝોન-1ના સ્ટાફના સભ્યોએ મહત્વની ભૂમિકા ભજવી હતી. પોલીસે આરોપી પાસેથી વધુ પૂછપરછ હાથ ધરી અન્ય ગુનાઓ અંગે તપાસ શરૂ કરી છે.
રિઢા આરોપીનો ચોંકાવનારો ગુનાહિત ઇતિહાસ
1. વસ્ત્રાપુર પોલીસ સ્ટેશન: ઇપીકો કલમ 380, 454, 457 (ઘરફોડ ચોરી)
2. બાયડ પોલીસ સ્ટેશન (અરવલ્લી): ઇપીકો કલમ 380, 454, 457
3. સોલા હાઇકોર્ટ પોલીસ સ્ટેશન: ઇપીકો કલમ 114, 380, 457
4. સોલા હાઇકોર્ટ પોલીસ સ્ટેશન: ઇપીકો કલમ 379 (ચોરી)
5. નારણપુરા પોલીસ સ્ટેશન: ઇપીકો કલમ 380, 454, 457
6. વસ્ત્રાપુર પોલીસ સ્ટેશન: ઇપીકો કલમ 380, 454, 457
7. સોલા હાઇકોર્ટ પોલીસ સ્ટેશન: ઇપીકો કલમ 379
8. પાલનપુર પોલીસ સ્ટેશન (બનાસકાંઠા): ઇપીકો કલમ 380, 457, 114
9. વસ્ત્રાપુર પોલીસ સ્ટેશન: ઇપીકો કલમ 380, 454, 457
10. આનંદનગર પોલીસ સ્ટેશન: ઇપીકો કલમ 114, 380, 457