અમદાવાદ : શહેરમાં મોડી રાત્રે વધુ એક ગંભીર અકસ્માતની ઘટના સામે આવી છે. અમદાવાદના આવેલા પ્રખ્યાત દાંડી પુલ નજીક એક મોંઘીદાટ વોલ્વો કાર અચાનક કેનાલમાં ખાબકતા ભારે અફડાતફડી મચી ગઈ હતી. ચંદ્રભાગા બ્રિજ નીચેથી પસાર થતી કેનાલ પાસે સર્જાયેલી આ દુર્ઘટનામાં કારની અંદર સવાર બે વ્યક્તિઓને ઈજાઓ પહોંચી હોવાના અહેવાલ પ્રાપ્ત થયા છે.
રિપોર્ટ મુજબ, 4થી જૂને મોડી રાતે 2.30 વાગ્યાની આસપાસ શહેરના ચંદ્રભાગા બ્રીજ નીચે આવેલ ખાડીમાં રાણીપ ડી માર્ટ તરફથી નવી બનતી કેનાલ ઉપર વાડજ જાહેર રોડ ઉપર એક ભાઈ ફોર વ્હીલર ગાડી લઈ બ્રીજ ઉપરથી નીચે કેનાલમાં ખાબક્યા હતા. ચંદ્રભાગા બ્રિજ પાસે તંત્ર દ્વારા છેલ્લા કેટલાક સમયથી ગરનાળું પૂરવાની અને કેનાલને સરખી કરવાની કામગીરી ચાલી રહી છે. મધ્યરાત્રિના સમયે આ કામકાજ ચાલુ હતું તે દરમિયાન જ આ લક્ઝુરિયસ કાર અચાનક સીધી કેનાલની અંદર ખાબકી ગઈ હતી.
આસપાસના લોકોનો આક્ષેપ છે કે, રાત્રિના સમયે આ સ્થળે કોઈ પૂરતી બેરિકેડિંગ કે ચેતવણી આપતા સાઈન બોર્ડ મૂકવામાં આવ્યા ન હતા, જેના કારણે કાર ચાલક અંધારામાં રસ્તો સમજી શક્યો ન હતો અને આ અકસ્માત સર્જાયો હતો. કાર ચાલક આ વિસ્તારથી અજાણ્યો હોવાથી પણ આ ગફલત થઈ હોવાની પ્રબળ શક્યતા જોવાઈ રહી છે.