અમદાવાદ : અમદાવાદના પોશ ગણાતા વિસ્તારોમાં ચાલતી શંકાસ્પદ સ્પા સેન્ટરોની પ્રવૃત્તિઓ પર અચાનક તવાઈ બોલાવવામાં આવી છે, સેટેલાઇટ અને એસ.જી. હાઇવે વિસ્તારમાં આવેલા સ્પા એન્ડ વેલનેસ સેન્ટરોમાં કાળી પ્રવૃત્તિઓ ચાલતી હોવાની બાતમીના આધારે SMCની ટીમોએ સરપ્રાઇઝ ચેકિંગ અને દરોડાની કડક કાર્યવાહી હાથ ધરી છે.જેના કારણે શહેરમાં ચકચાર મચી ગઈ છે.
રિપોર્ટ મુજબ, પોલીસને ચોક્કસ માહિતી મળી હતી કે સ્પા અને વેલનેસ સેન્ટરના નામે દેહવ્યાપારની ગેરકાયદેસર પ્રવૃત્તિઓ ચલાવવામાં આવી રહી છે. આ માહિતીના આધારે ટીમોએ દરોડા પાડીને સ્થળ પરથી કેટલીક યુવતીઓ અને ગ્રાહકોને ઝડપી પાડ્યા છે.SMC દ્વારા અમદાવાદ શહેરના અલગ અલગ વિસ્તારોમાં કુલ 6 જગ્યાઓએ સ્પા સંબંધિત સર્ચ ઓપરેશન હાથ ધરવામાં આવ્યું હતું. જેમાંથી નીચે જણાવેલ 4 જગ્યાઓએ સફળ દરોડા પાડીને કાયદેસરની કાર્યવાહી શરૂ કરવામાં આવી છે.
દરોડા દરમિયાન સ્પા સેન્ટરોમાંથી સંચાલકો ઉપરાંત અનેક ગ્રાહકો અને યુવતીઓ મળી આવ્યા હતા. પોલીસે ઝડપાયેલા ગ્રાહકો અને યુવતીઓની પૂછપરછ હાથ ધરીને ગેરકાયદેસર નેટવર્ક ચલાવતા મુખ્ય સંચાલકો સામે કાયદેસરની કાર્યવાહી કરવાની તજવીજ હાથ ધરી છે.સ્થાનિક પોલીસ ઊંઘતી ઝડપાઈ અને સ્ટેટ મોનિટરિંગ સેલે સીધા દરોડા પાડીને કડક સપાટો બોલાવતાં શહેરના અન્ય સ્પા સંચાલકોમાં પણ ભારે ફફડાટ વ્યાપી ગયો છે.
ઉલ્લેખનીય છે કે, તાજેતરમાં જ શહેરના પૂર્વ વિસ્તારમાં એક સ્પા સેન્ટરમાં યુવતીઓના કામ બાબતે થયેલી બોલાચાલીમાં મેનેજરને ચોથા માળેથી નીચે ફેંકી દઈ તેની હત્યા કરી દેવાઈ હતી. આ ચકચારી ઘટના બાદ સ્પા સેન્ટરોમાં ચાલતી શંકાસ્પદ પ્રવૃત્તિઓ સામે અનેક સવાલો ઊભા થયા હતા.
ચાર સ્પા સેન્ટર પર દરોડા
A9 સ્પા (સેટેલાઇટ)
ઓરેંજ સ્પા (વસ્ત્રાપુર)
ગેલેક્સી સ્પા (બોડખદેવ)
બ્લોક્સમ સ્પા (બોડકદેવ)