અમદાવાદ : AMC દ્વારા સફાઇ અભિયાન અંતર્ગત શ્રેણી બંધ પગલા લેવામાં આવી રહ્યા છે. છતાં જાહેર સ્થળે અથવા સોસાયટીના નાકે અનેક વાર ફરિયાદો કરવા છતાં કચરાના ઢગલા ખડકાયેલા જોવા મળે છે, પરંતુ યોગ્ય પ્લેટફોર્મની માહિતીના અભાવે આપણે માત્ર નારાજગી વ્યક્ત કરીને ચૂપ થઈ જઈએ છીએ. હવે આ સમસ્યાનો કાયમી ઉકેલ લાવવા માટે AMC દ્વારા ડિજિટલ માધ્યમથી નાગરિકો માટે ફરિયાદ નિવારણ પ્રક્રિયા અત્યંત સરળ બનાવી દેવામાં આવી છે.
વિકસતા અને સ્માર્ટ બનતા અમદાવાદ શહેરમાં સ્વચ્છતા જાળવી રાખવી એ હવે માત્ર મ્યુનિસિપલ કોર્પોરેશન (AMC) કે સફાઈ કામદારો એકલાની જવાબદારી નથી રહી, પરંતુ તેમાં શહેરના પ્રત્યેક નાગરિકની સક્રિય ભાગીદારી અનિવાર્ય બની ગઈ છે. જો તમારા ઘરની આસપાસ, શેરીમાં કે કોઈ જાહેર સ્થળે કચરો કે ગંદકી નજરે પડે, તો તમે ઘરે બેઠા કે રસ્તા પરથી જ મિનિટોમાં AMC તંત્ર સુધી આ અસુવિધા પહોંચાડી શકો છો-
હવે કચરો દેખાય તો ચૂપ ન બેસો, અપનાવો આ સરળ ‘4-સ્ટેપ ફોર્મ્યુલા’
ફોટો પાડો (Capture): તમારા વિસ્તારમાં પડેલા કચરા કે ગંદકીનો સ્પષ્ટ ફોટો તમારા મોબાઈલના કેમેરામાં ક્લિક કરો.
લોકેશન મોકલો (Share Location): સ્માર્ટફોનની મદદથી તે ચોક્કસ જગ્યાનું લાઈવ લોકેશન અથવા સરનામું નોંધી લો.
ફરિયાદ નોંધાવો (Register Complaint): અમદાવાદ મ્યુનિસિપલ કોર્પોરેશનની અધિકૃત ‘AMC Seva’ (Ahmedabad 311) મોબાઈલ એપ્લિકેશન ખોલો. તેમાં ‘Solid Waste Management’ વિભાગમાં જઈને ફોટો અને લોકેશન અપલોડ કરી તમારી ફરિયાદ નોંધાવો. આ સિવાય AMCના સત્તાવાર હેલ્પલાઇન નંબર 155303 પર પણ સંપર્ક કરી શકાય છે.
સફાઈની ખાતરી કરો (Verify & Resolve): ફરિયાદ નોંધાયા બાદ તંત્ર દ્વારા લેવાયેલા પગલાં અને સફાઈ કામગીરીનું સ્ટેટસ તમે એપ પર જ ટ્રેક કરી શકો છો, જેથી કામ સમયસર પૂરું થયું છે કે નહીં તેની ખાતરી થઈ શકે.
શહેરના સત્તાવાળાઓનું માનવું છે કે અમદાવાદને દેશનું મોસ્ટ ક્લીન અને નંબર વન સિટી બનાવવું હોય તો માત્ર સફાઈ અભિયાન ચલાવવાથી કામ નહીં ચાલે, પરંતુ લોકભાગીદારી સૌથી મોટું હથિયાર સાબિત થશે. જ્યારે દરેક અમદાવાદી પોતાના વિસ્તાર પ્રત્યે સજાગ બનશે અને ગંદકી સામે અવાજ ઉઠાવશે, ત્યારે જ ખરા અર્થમાં ‘સ્વચ્છ અને સુંદર અમદાવાદ’નું સ્વપ્ન સાકાર થશે.