અમદાવાદ : અમદાવાદ મ્યુનિસિપલ કોર્પોરેશન (AMC)ના ઉત્તર પશ્ચિમ ઝોનના એસ્ટેટ અને નગર વિકાસ ખાતા દ્વારા શહેરમાં ગેરકાયદે દબાણો અને જાહેર માર્ગો પરના અનધિકૃત પાર્કિંગ સામે લાલ આંખ કરવામાં આવી છે. મુખ્ય માર્ગો પર વાહનવ્યવહાર સુચારુ રહે અને નાગરિકોને ટ્રાફિકની સમસ્યા ન નડે તે માટે ડમરુ સર્કલ, ચાંદલોડિયા અને ગોતા સહિતના વિસ્તારોમાં સઘન ઝુંબેશ ચલાવવામાં આવી હતી.
રિપોર્ટ મુજબ, ડમરુ સર્કલથી કારગિલ પેટ્રોલ પંપ થઈ હાઇકોર્ટ, ગોતા ચાર રસ્તા તેમજ પકવાનથી જીજીએસ બંગલો થઈ માનસી સર્કલ, વસ્ત્રાપુર તળાવ ફરતે અને બોપલ BRTS સુધીના માર્ગો પર અનધિકૃત પાર્કિંગ સામે કાર્યવાહી કરવામાં આવી હતી. આ દરમિયાન જાહેર રસ્તા પર પાર્ક કરાયેલા 39 વાહનોને લોક કરવામાં આવ્યા હતા. વાહનચાલકોને જાહેર રસ્તા પર વાહન પાર્ક ન કરવા તેમજ સંબંધિત બિલ્ડિંગમાં સૂચિત પાર્કિંગ સ્થળનો જ ઉપયોગ કરવા સૂચના આપવામાં આવી છે.
દબાણ હટાવ કામગીરી દરમિયાન 6 છતવાળી લારીઓ, 5 સાદી લારીઓ/કાઉન્ટર, 7 લોખંડની એંગલો/લાકડાની વળીઓ, 2 તાડપત્રી, 3 જાહેરાતના બોર્ડ, 6 બેનર-પતાકા અને 75 પરચૂરણ સામાન જપ્ત કરીને ગોડાઉનમાં જમા કરવામાં આવ્યો હતો. આ કાર્યવાહી અંતર્ગત રૂ. 19,500નો વહીવટી ચાર્જ વસૂલવામાં આવ્યો હતો.
ચાંદલોડિયા વિસ્તારમાં TP સ્કીમ નં. 233, ત્રાગડમાં કાચી ઓરડી દૂર કરી 1,116 ચો.મી. પ્લોટનો કબજો લેવામાં આવ્યો હતો. ઉપરાંત 12 મીટરના રસ્તા પરના ઝાડી-ઝાંખરા, દિવાલ અને ક્રોસ વોલ દૂર કરીને આશરે 230 મીટર રોડ ખુલ્લો કરવામાં આવ્યો હતો. ચાલુ બાંધકામ સાઇટ પર પર્યાવરણ અને સલામતીના નિયમોનું પાલન ન કરવા તથા રોડ પર બિલ્ડિંગ મટિરિયલ મૂકી દબાણ કરવા બદલ રૂ. 15,000નો દંડ વસૂલાયો હતો.
ગોતા વિસ્તારમાં TP સ્કીમ નં. 57માં 30 મીટરના રોડ પરનું બિનરહેણાંક ઓરડીનું બાંધકામ દૂર કરીને આશરે 270 મીટર રોડ ખુલ્લો કરવામાં આવ્યો હતો. જ્યારે થલતેજ વિસ્તારમાં બે ચાલુ બાંધકામ સાઇટ સામે નોટિસની કાર્યવાહી બાદ રોડ પર દબાણ, સલામતીના જરૂરી નેટ તથા બેરિકેડિંગના અભાવ અને ફૂટપાથને નુકસાનના મુદ્દે કુલ રૂ. 40,000નો વહીવટી ચાર્જ વસૂલ કરવામાં આવ્યો હતો.
AMCના જણાવ્યા મુજબ ઉત્તર પશ્ચિમ ઝોનમાં અત્યાર સુધીની આ કાર્યવાહીમાં 39 વાહનો લોક, 11 લારીઓ અને 75 પરચૂરણ સામાન જપ્ત કરવામાં આવ્યા છે તથા કુલ રૂ. 74,500નો વહીવટી ચાર્જ દંડ પેટે વસૂલ કરવામાં આવ્યો છે.
AMCના ઉત્તર પશ્ચિમ ઝોન દ્વારા જણાવવામાં આવ્યું છે કે આગામી દિવસોમાં પણ ફૂટપાથ, ટી.પી. રોડ, મ્યુનિસિપલ પ્લોટ અને ગેરકાયદે બાંધકામો પરના દબાણો હટાવવાની આ કાર્યવાહી વધુ કડક રીતે ચાલુ રાખવામાં આવશે.