અમદાવાદ : અમદાવાદવાસીઓ અને હવાઈ મુસાફરો માટે જાહેર પરિવહનની સુવિધા વધુ સુદ્રઢ બનવા જઈ રહી છે. અમદાવાદ મેટ્રો ફેઝ-2એ હેઠળ કોટેશ્વર રોડથી સરદાર વલ્લભભાઈ પટેલ ઇન્ટરનેશનલ એરપોર્ટ સુધી મેટ્રો કનેક્ટિવિટી વિકસાવવાનો માર્ગ મોકળો બન્યો છે.
રિપોર્ટ મુજબ,અમદાવાદ મેટ્રો ફેઝ-2એ હેઠળ આશરે 6 કિમી લાંબા આ મેટ્રો રૂટમાં 4.97 કિમીનો એલિવેટેડ કોરિડોર અને 1.01 કિમીનો અંડરગ્રાઉન્ડ કોરિડોર બનાવવામાં આવશે. એલિવેટેડ કોરિડોર કોટેશ્વર રોડના છેડાથી અંડરગ્રાઉન્ડ સેક્શનના રેમ્પ સુધી રહેશે. જ્યારે એરપોર્ટ તરફના ભાગમાં અંડરગ્રાઉન્ડ ટનલ અને સ્ટેશન બનાવવામાં આવશે. પ્રોજેક્ટ માટે યુટિલિટી શિફ્ટિંગની કામગીરી લગભગ પૂર્ણ થઈ ગઈ છે અને સિવિલ વર્કનો કોન્ટ્રાક્ટ અપાઈ જતાં આગામી દિવસોમાં ગ્રાઉન્ડ લેવલ પર બાંધકામ શરૂ થવાની શક્યતા છે.
ઍરપૉર્ટ ખાતે બનનારા અંડરગ્રાઉન્ડ સ્ટેશન પરથી મુસાફરો લિફ્ટ, એસ્કેલેટર અને સીડીઓની મદદથી સીધા જ ડોમેસ્ટિક અને ઇન્ટરનેશનલ ટર્મિનલમાં પ્રવેશ કરી શકશે, જેનાથી મુસાફરોનો સમય બચશે અને અવરજવર સરળ બનશે. રૂટ પર યુટિલિટી શિફ્ટિંગની કામગીરી લગભગ પૂર્ણ થઈ ગઈ છે અને સિવિલ વર્કનો કોન્ટ્રાક્ટ સોંપાઈ જતાં હવે દિવાળી બાદ ગ્રાઉન્ડ લેવલ પર બાંધકામ પૂરજોશમાં શરૂ થવાની શક્યતા છે.
અંડરગ્રાઉન્ડ સેક્શનમાં 1.01 કિમી લાંબી ટ્વિન કટ-એન્ડ-કવર ટનલ, રેમ્પ અને અંડરગ્રાઉન્ડ સ્ટેશનનું નિર્માણ કરવામાં આવશે. આ વ્યવસ્થાથી એરપોર્ટ સુધી મેટ્રો પહોંચશે અને હવાઈ મુસાફરી કરતા પેસેન્જરોને જાહેર પરિવહનનો વધુ એક વિકલ્પ મળશે.
અમદાવાદ મેટ્રો ફેઝ-2Aના આ એરપોર્ટ કોરિડોરને કેન્દ્રીય કેબિનેટે 10 જૂન, 2026ના રોજ મંજૂરી આપી હતી. સમગ્ર પ્રોજેક્ટનો અંદાજિત પૂર્ણતા ખર્ચ 2,169.04 કરોડ રૂપિયા છે, જેમાં બાંધકામ દરમિયાનના વ્યાજનો પણ સમાવેશ થાય છે. આ પ્રોજેક્ટ હેઠળ આશરે 6 કિમીના રૂટ પર 5 સ્ટેશન બનાવવામાં આવશે.
એરપોર્ટ સુધી મેટ્રો કનેક્ટિવિટી શરૂ થતાં અમદાવાદ અને ગાંધીનગરના હાલના મેટ્રો નેટવર્કનો વિસ્તાર વધશે. આ કોરિડોર કાર્યરત થયા બાદ બંને શહેરોમાં મેટ્રોનું કુલ સંચાલિત નેટવર્ક 77.63 કિમી થશે. એરપોર્ટ સુધી પહોંચવા માટે રોડ પરિવહન ઉપરાંત મેટ્રોનો વિકલ્પ મળતાં પેસેન્જરોને ટ્રાફિકની સમસ્યામાંથી રાહત મળી શકે છે. સાથે જ એરપોર્ટ તરફના વિસ્તારોમાં રહેનારા લોકો, કર્મચારીઓ અને પ્રવાસીઓ માટે અવરજવર વધુ સરળ બનવાની અપેક્ષા છે.