અમદાવાદ : હિન્દી ફિલ્મોમાં પોલીસ જે રીતે આરોપીઓને પકડવા માટે વાનમાં પીછો કરે છે તેવી જ ઘટના અમદાવાદમાં સિંધુ ભવન રોડ પર બની હતી. બે પોલીસ કર્મચારીઓ પોતાની ફરજ બજાવી રહ્યા હતા. તે સમયે એક કારને રોકાવતા કારમાં બેઠેલા નબીરાઓ ત્યાંથી ભાગી ગયા હતા. જેથી તેમનો પીછો કરી કારને થોડી દૂર ઝડપી પાડી હતી. ઉશ્કેરાયેલા કાર સવાર નબીરાઓએ કાર રોકીને પોલીસ કર્મચારીઓને માર માર્યો હતો. જે બાદ પોલીસે એક આરોપીને દબોસી લીધો હતો, જ્યારે બાકીના ચાર શખસો ફરાર થઇ ગયા હતા. પોલીસે ફરાર ચાર આરોપીને પકડવા માટે અલગ અલગ ટીમ બનાવી કામે લગાડી છે.
મીડિયા રિપોર્ટ મુજબ સિંધુ ભવન રોડ પર પોલીસ દ્વારા વાહન ચેકિંગ ચાલી રહ્યું હતું. તે દરમિયાન એક વરના કાર ત્યાંથી પસાર થઈ રહી હતી. જેની સ્પીડ વધારે લાગતા પોલીસે આ કારને રોકાવી હતી. ત્યારે કારમાં પાંચેક જેટલા શખસો બેઠા હતા. કાર રોકાવતા તે શખસો પોલીસ સાથે ઝઘડો કરવા લાગ્યા અને થોડી જ વારમાં કારના ચાલકે તેની કાર પોલીસ કર્મચારીઓ પર ચડાવી દીધી હતી. જે બાદ ત્યાંથી કાર હંકારી ભાગી છુટ્યા હતા. જેથી પોલીસને શંકા જતા તેની પીછો કર્યો હતો.આગળ જતાં કાર રાજપથ ક્લબ તરફ વળી હતી. થોડી જ વારમાં પોલીસે તેનો પીછો કરી અને કારને ઝડપી પાડી હતી.
સમગ્ર ઘટનાક્રમ દરમ્યાન કારમાંથી એક પછી એક શખશો ઉતરતા ગયા અને ભાગી ગયા હતા. જ્યારે એક શખસ પોલીસના હાથે ઝડપાઈ ગયો હતો. 23થી 24 વર્ષના આ યુવાનોએ પોલીસને માર મારી અને તેના પર ગાડી ચડાવવાનો પ્રયાસ કર્યો હતો. હવે તેમને પકડવા માટે પોલીસે પ્રયાસો શરૂ કરી દીધા છે. પોલીસ દ્વારા હત્યાની કોશિશનો ગુનો દાખલ કરીને આરોપીઓને પકડવા માટે અમે અલગ અલગ ટીમ બનાવી તપાસ શરૂ કરી છે.
