અમદાવાદ : આગામી 31 માર્ચે અમદાવાદના નરેન્દ્ર મોદી સ્ટેડીયમ ખાતે ગુજરાત ટાઈટન્સ અને ચેન્નઈ વચ્ચે મેચ રમાવાની છે. રૂ.1 હજારની ઓનલાઈ ટિકિટ બુક કરાવીને રૂ.2900 માં વેચી કાળાંબજારી કરતાં યુવકને LCBએ 20 ટિકિટ સાથે ઝડપી પાડ્યો છે.
પ્રાપ્ત રિપોર્ટ મુજબ કેટલાક શખ્સો ટિકિટની કાળા બજારી કરતા હોવાની બાતમી ડીસીપી ઝોન 2ની LCBને મળી હતી. બાતમીના આધારે ઓનલાઇન ટિકિટ બુક કરનાર તત્વો પર નજર રાખીને પોલીસ બેઠી હતી, ત્યારે માહિતી મળી હતી કે, ઝુંડાલ સર્કલ પાસે આવેલા સર્વિસ રોડ પર એક યુવક મેચની ટિકિટને પોતાના આર્થિક ફાયદા માટે કાળા બજારી કરી રહ્યો છે.
જેના આધારે LCBની ટીમે તે જગ્યાએ વોચ ગોઠવી કાળા બજારી કરતા શખ્સને ઝડપી પાડ્યો હતો. બાદમાં તેની પૂછપરછ કરતાં પોતાનું નામ બ્રિજેશ કાપડિયા અને ચાંદખેડા વૃંદાવન ગોદરેજ ગાર્ડન સિટીમાં રહેતો હોવાનું જણાવ્યું હતું. તેની પાસેથી મેચની 20 ટિકિટો મળી આવી હતી. જેથી બ્રિજેશની પુછપરછ કરતા ગુજરાત ટાઈટન્સ અને ચેન્નઈ વચ્ચે રમાતી મેચના કારણે લોકોમાં ક્રેઝ વધારે હોવાથી મોંઘા ભાવની જો ટિકિટ નહીં મળે તો માંગ્યા પૈસા આપીને પણ ટિકિટ લેશે તેમ વિચારીને ઓનલાઈન ટિકિટી બુક કરાવી મેળવી લીધી હતી.
LCBએ બ્રિજેશ વિરૂદ્ધ ચાંદખેડા પોલીસ સ્ટેશનમાં કાળા બજારી ટિકિટ વેચવાનો ગુનો દાખલ કરીને તપાસ શરૂ કરી છે.ટિકિટની કાળાબજારીમાં શાતીર બનેલા બ્રિજેશ સાથે કોણ-કોણ જોડાયું છે, તે મામલે પણ પોલીસે તપાસ શરૂ કરી છે.