અમદાવાદ : તાજેતરમાં હનીટ્રેપનાં કિસ્સાઓમાં વધારો થઈ રહ્યો છે. સ્વરૂપવાન યુવતીઓ તેમજ મહિલાઓ પોતાનાં મોજ શોખ પુરા કરવા માટે લોકોને હનીટ્રેપનો શિકાર બનાવી રહી છે.અમદાવાદમાં એક મહિલાએ પગના દુ:ખાવાના બહાને ડૉક્ટરના નંબર લઈને તેની સાથે ફોન પર વાતો કરીને પ્રેમજાળમાં ફસાવ્યો હતો. ત્યારબાદ તેની પાસેથી કેનેડા જવાના બહાને 50 હજાર રૂપિયા રોકડા મેળવી લીધા હતાં. જો કે, મહિલાની છેતરપિંડી અહીં સુધી અટકી નહી, ડૉક્ટર સાથે શારિરીક સંબંધ બાંધી ત્યારબાદ પોતાના સાથીદારો પાસેથી બ્લેકમેઈલિંગ કરાવીને 50 લાખની માંગ કરી હતી. તેમાંથી એક શખ્સે તો ડૉક્ટરને જાનથી મારી નાંખવાની પણ ધમકી આપી હતી. આ અંગેની ફરિયાદ હાલ ડૉક્ટરે ચાંદખેડા પોલીસ સ્ટેશનમાં કરી છે.
પ્રાપ્ત વિગતો પ્રમાણે ચાંદખેડામાં રહેતાં ડોકટરએ પોલીસ ફરિયાદમાં જણાવ્યું હતું કે, 10મી જૂનના રોજ અન્ય શહેરની હોસ્પિટલમાં તેઓ હાજર હતાં તે દરમિયાન એક મહિલા આવી હતી. તેને પગમાં દુઃખાવાની ફરિયાદ કરતાં તેની સારવાર કરી હતી અને ડાબા પગે રસોળીની ગાંઠ હોવાનું જણાતાં તેમને ઓપરેશન કરાવવું પડશે તેમ જણાવ્યું હતું. ત્યારે આ મહિલાએ ડૉક્ટરને કહ્યું હતું કે, હું બહાર રહું છું અને અમદાવાદમાં તેમના સંબંધીના ઘરે રોકાય છે. જેથી જો તમારો નંબર આપો તો હું તમારી એપોઈન્ટમેન્ટ લઈને સારવાર માટે આવી શકું. જેથી ડોક્ટરે આ મહિલાને તેમનો નંબર આપ્યો હતો.
આ મહિલાએ ડૉક્ટર સાથે ફોન પર અને વ્હોટ્સએપ પર વાર્તાલાપ કર્યો હતો અને ડૉક્ટરને પ્રેમજાળમાં ફસાવ્યા હતાં. ત્યારબાદ મહિલાએ ડૉક્ટર પાસેથી રૂપિયા કેનેડા જવાના બહાને લીધા હતાં. ત્યારબાદ યુવતી ડૉક્ટરની ક્લિનીક પર વારંવાર અવરજવર કરવા માંડી હતી. એક વખત તો ડોક્ટર અને યુવતી વચ્ચે સહમતિથી શારિરીક સંબંધો બંધાયા હતાં. બંને જણા જયારે ડોક્ટરના ઘરમાં બેઠા હતાં ત્યારે બે માણસો તેમના ઘરે આવ્યા અને આવી કહ્યું – ‘દરવાજો ખોલો મારી બહેન અંદર છે. ત્યારબાદ 6 જેટલા માણસો આવ્યા હતાં. તેમણે ડોક્ટરને કહ્યું હતું કે, તમે મારી બહેન પર બળાત્કાર ગુજાર્યો છે. અમે તેના પિતાને બોલાવીએ છીએ અને પોલીસ ફરિયાદ કરીએ છીએ.’
આ છ જણામાંથી એક શખ્સે ડૉક્ટરને છરી બતાવી હતી અને કેટલાકે તેને માર માર્યો હતો. એક ઈસમે તો એવું કહ્યું હતું કે, આ બધુ પતાવી દેવું હોય તો 50 લાખ રૂપિયા આપો. જો નહીં આપો તો જાનથી મારી નાંખીશું. એક શખ્સે તો એવું પણ કહ્યું હતું કે, હું અગાઉ મર્ડરના ગુનામાં જેલમાં જઈ આવ્યો છું. તમને પણ મારી નાંખીશ.ત્યાર બાદ ડોક્ટરે પૈસા આપવાની ના પાડી હતી અને છેવટે 15 લાખ રૂપિયા આપીને મામલો પુરો કરવાનું કહ્યું હતું પણ ડૉક્ટરે પૈસા નહોતા આપ્યા. જેથી એક વ્યક્તિએ પોલીસ સ્ટેશનમાં ફોન કર્યો હતો અને પોલીસ ત્યાં આવતાં ડોક્ટર પોલીસ સ્ટેશન પહોંચ્યા હતાં. જ્યાં તેમણે પોતાની સાથે થયેલી ઘટના અંગેની ફરિયાદ નોંધાવી હતી.
