અમદાવાદ : શહેરના નવા વાડજ ગણેશ વિદ્યાલય પાસે આવેલી રાજ રેસિડેન્સીની એક દુકાનમાં આવેલા ગેરેજની આડમાં ચાલતા વિદેશી દારૂનો કારોબાર પીસીબીએ પકડી પાડયો છે. ગેરેજમાં બનાવેલા લાકડાના ખાનામાંથી પોલીસે દારૂ – બીયરની 485 બોટલો સાથે બે પિત્તરાઈ ભાઈની ધરપકડ કરી હતી.
પ્રાપ્ત વિગતો મુજબ નવા વાડજ વિસ્તારમાં આવેલ રાજ રેસિડેન્સીમાં આવેલી એક દુકાનમાં ચાલતા જય ભવાની ઓટો ગેરેજની આડમાં દારૂનો ધંધો ચાલતો હોવાની સંયુક્ત બાતમીના આધારે PCB પીઆઈ એમ.સી.ચૌધરીએ ટીમ સાથે દરોડો પાડયો હતો. દરમિયાનમાં ત્યાંથી ગેરેજ માલિક રોનક અશ્વીનભાઈ મકવાણા (સમેત એપાર્ટમેન્ટ, સુભાષબ્રિજ) અને તેનો કાકાનો દીકરો ચિરાગ રાજેશભાઈ મકવાણા (કૌશિકભુવન, ઉસ્માનપુરા) મળી આવ્યા હતા.જ્યારે પોલીસે ગેરેજમાં બનાવેલા કેટલાક લાકડાના ખાનામાં તપાસ કરતા તેમાંથી વિદેશી દારૂની બોટલો મળી આવી હતી.આ ઉપરાંત ત્યાંથી મળી આવેલા 1 ટુ વ્હીલરમાંથી દારૂની 2 બોટલ અને કારમાંથી દારૂની 1 પેટી મળીને કુલ 485 બોટલ (કિંમત રૂ.59,672) તેમજ 2 વાહન, મોબાઈલ ફોન મળીને કુલ રૂ.2.27 લાખની કિંમતનો મુદ્દામાલ મળી આવ્યો હતો.
પોલીસે દારૂ સહિતના મુદ્દામાલ સાથે રોનક અને ચિરાગની ધરપકડ કરીને પૂછપરછ કરતા તે બંને જણાં આ દારૂનો જથ્થો ગાંધીનગર ઝુંડાલમાં રહેતા બુટલેગર મુકેશ મારવાડી પાસેથી દારૂનો જથ્થો લાવતા હોવાનું કબુલ્યુ હતુ. મુકેશ મારવાડી પાસેથી દારૂ લાવીને ભાડાની દુકાનમાં ગેરેજમાં છુપાવી રાખીને તેઓ છુટકમાં હોમ ડિલિવરીમાં દારૂ – બીયર વેચતા હતા.