અમદાવાદ : રાજ્યમાં દારૂની હેરાફેરી માટે બૂટલેગરો અવનવા રસ્તાઓ અપનાવતા હોય છે, ત્યારે આવી જ એક ઘટના અમદાવાદમાં સામે આવી છે. સરખેજ વિસ્તારમાં આવેલા ટ્રાન્સપોર્ટ ગોડાઉનમાં પતરાના કલરના ડબ્બાઓની આડમાં દારૂનો જથ્થો સંતાડવામાં આવ્યો હતો. PCBની ટીમે દરોડો પાડી દારૂના જથ્થા સહિત 13 લાખથી વધુના મુદામાલ સાથે ત્રણ આરોપીઓની ધરપકડ કરી છે.
અમદાવાદ PCBએ પાકી બાતમીના આધારે અમદાવાદના સરખેજ વિસ્તારમાં આવેલા ઉજાલા સર્કલ પાસે સાગર એસ્ટેટમાં માવેલ એસર ગ્રીન કેરીઝ પ્રા.લિમિટેડ નામના ગોડાઉન પાસે દરોડો પાડવામાં આવ્યો હતો. ગોડાઉનની આગળ પડેલા કલરના પતરાના ડબ્બાઓમાં કલરના પાઉચ નીચે લાકડાના ભૂસામાં દારૂનો જથ્થો સંતાડવામાં આવ્યો હતો. પોલીસે કલરના ડબ્બાઓમાંથી વિદેશી દારુની 6 લાખથી વધુની કિંમતની 412 જેટલી બોટલો સહિત 13 લાખથી વધુનો મુદ્દામાલ કબ્જે કર્યો છે અને ત્રણ આરોપીની ધરપકડ કરી છે.
પોલીસે માધુસિંહ દેવીસિંહ રાજપુત, રજાકખાન મજીદખાન પઠાણ તેમજ રિઝવાન ઉર્ફે લાલો સીમહંમદ વોરાની ધરપકડ કરી છે. આ ત્રણેય આરોપીઓએ દિલ્હીથી ટ્રાન્સપોર્ટ મારફત દારૂની જથ્થો મંગાવ્યો હતો. દિલ્હીથી લક્ષ્મણસિંહ સિસોદિયા તેમજ ઈશ્વર રાજપૂત પાસેથી વિદેશી દારૂનો જથ્થો મંગાવ્યો હતો. દિલ્હીથી શ્રીરામ એન્ટરપ્રાઈઝ નામની કંપનીના નામે કલરના પતરા ડબ્બાઓની આડમાં કલરના ડબ્બામાં પાઉચ તેની નીચે લાકડાના ભૂસામાં વિદેશી દારૂની સીલબંધ બોટલો સંતાડી તેનું પેકિંગ કરી અમદાવાદ મોકલવામાં આવ્યા હતા.
હાલ તો પોલીસે દિલ્હીથી દારૂનો જથ્થો મોકલનાર અશોક બારોટ, લક્ષ્મણ લાલસિહ સિસોદિયા તેમજ ઈશ્વર રાજપુતની શોધખોળ હાથ ધરી છે. તેમજ જે આરોપીઓએ ટ્રાન્સપોર્ટ દ્વારા દારૂનો જથ્થો મંગાવ્યો છે તેણે અગાઉ કોઈ વખત આ પ્રમાણે દારૂનો જથ્થો મંગાવ્યો હતો કે કેમ તેમજ આ દારૂનો જથ્થો અન્ય કોઈ વ્યક્તિને આપવાનો હતો કે કેમ તે તમામ મુદ્દા ઉપર પોલીસે વધુ તપાસ કરી છે.