અમદાવાદ : રાજકોટ બાદ હવે અમદાવાદમાં પણ દિવાળીના તહેવારો દરમિયાન ફટાકડા ફોડવા માટે ચોક્કસ સમય જાહેર કરવામાં આવ્યો છે. હકીકતમાં અમદાવાદ પોલીસ કમિશનર દ્વારા ફટાકડા ફોડવા અંગે જાહેરનામું બહાર પાડવામાં આવ્યું છે. જે મુજબ અમદાવાદીઓ દિવાળીમાં માત્ર બે કલાક જ ફટાકડા ફોડી શકશે.
અમદાવાદ પોલીસ કમિશનર જી.એસ.મલિક દ્વારા દિવાળીના તહેવાર દરમિયાન ફોડવામાં આવતા ફટાકડાને કારણે આગ અને અકસ્માતોના બનાવો અને જાહેર જનતાની સલામતી જળવાય તે માટે ફટાકડાના ખરીદ, વેચાણ અને ઉપયોગને લઈને જાહેરનામું બહાર પાડવામાં આવ્યું છે. જેમાં જણાવ્યા મુજબ રાત્રે 8 થી 10 વાગ્યા સુધી જ ફટાકડા ફોડી શકશે.
આ ઉપરાંત હોસ્પિટલ, નર્સિંગ હોમ, સ્કૂલ, ન્યાયાલય, એરપોર્ટ, પેટ્રોલ પંપ અને ધાર્મિક સ્થળોના 100 મીટર ના ત્રીજયાનો વિસ્તાર સાયલેંટ ઝોન ગણાશે. જ્યાં કોઈ પણ પ્રકારના ફટાકડા ફોડી શકાશે નહીં. આ ઉપરાંત પ્રદૂષણ વધવાની શક્યતાને જોતા ફટાકડાની લૂમ ફોડવા ઉપર પણ રોક લગાવી દેવામાં આવી છે.125 ડેસીબલથી 145 ડેસીબલ સુધીના ફટાકડા ફોડવા જરૂરી છે. ફટાકડાની લૂમ દ્વારા પ્રદુષણ અને ઘન કચરો ફેલાતો હોવાથી પ્રતિબંધ લગાવાયો છે.બજાર, શેરીઓ અને સાંકડી ગલીઓમાં ફટાકડા ફોડવા પર પણ પ્રતિબંધ લગાવવામાં આવ્યો છે.
આ ઉપરાંત લાઇસન્સ ધારક વેપારીઓ જ ફટાકડાનું વેચાણ કરી શકશે. જ્યારે ઇ કોમર્સ વેબસાઈટ ઉપર ફટાકડાનું ઓનલાઈન વેચાણ થઈ શકશે નહીં. આ સિવાય ચાઈનીઝ તુક્કલના વેચાણ અને તેને ઉડાડવા પર પ્રતિબંધ મૂકવામાં આવ્યો છે. જો કે નૂતન વર્ષના તહેવાર દરમિયાન રાત્રે 11:55 થી 12:30 થી સુઘી ફટાકડા ફોડવાની છૂટ આપવામાં આવી છે.
આ સાથે જ પોલીસ દ્વારા લોકોને આ જાહેરનામાનો અમલ કરવા તાકીદ કરાઈ છે. જો કોઈ પણ આ જાહેરનામાનો ભંગ કરતા પકડાશે તો તેના વિરુદ્ધ કાયદેસરની કાર્યવાહી કરવામાં આવશે, એમ પણ જાહેરનામામાં જણાવવામાં આવ્યું છે.
તમને જણાવી દઈએ કે આજથી ત્રણ દિવસ અગાઉ રાજકોટ પોલીસ કમિશનર દ્વારા પણ ફટાકડા ફોડવા અંગે જાહેરનામું બહાર પાડવામાં આવ્યું હતું. જેમાં રાત્રે 10 થી 12 વાગ્યા સુધી ફટાકડા ફોડવાની મંજૂરી આપવામાં આવી હતી.
