અમદાવાદ : AMCનો નવતર પ્રયોગ સામે આવ્યો છે. તાજેતરમાં નરેન્દ્ર મોદી સ્ટેડિયમમાં રમાયેલ તમામ મેચમાંથી પ્લાસ્ટિકનો કચરો એકત્ર કરી AMCના ગાર્ડન વિભાગ અને સ્વૈચ્છિક સંસ્થાઓએ વેસ્ટમાંથી બેસ્ટનું નિર્માણ કર્યું હતું. લગભગ 1 હજાર કિલો પ્લાસ્ટિકનો કચરો એકત્ર કરી 10 બાંકડા અને સફાઈ કર્મચારીઓ માટે રિફ્લેક્ટેડ જેકેટ બનાવવામાં આવ્યા છે.
પ્રાપ્ત વિગતો મુજબ તાજેતરમાં અમદાવાદના નરેન્દ્ર મોદી સ્ટેડિયમ ખાતે યોજાયેલ વર્લ્ડકપની મેચ દરમિયાન આવેલા પ્રેક્ષકોએ ફેંકેલ પ્લાસ્ટીકની બોટલ અને પ્લાસ્ટિકના ગ્લાસમાંથી AMCએ બાંકડા બનાવ્યા છે. 50 કિલો પ્લાસ્ટિકમાંથી એક એવા દસ બાંકડા કોકાકોલા નામની કંપની દ્વારા AMCને આપવામાં આવ્યા છે. આગામી દિવસોમાં અમદાવાદ શહેરના બગીચાઓમાં અને જાહેર સ્થળોએ જોવા મળી શકે છે આ પ્લાસ્ટિકના બાંકડા. ચાર બોટલ એકત્ર કરી તેમાંથી જેકેટ તૈયાર કરવામાં આવ્યા છે. રાત્રી દરમિયાન કામ કરતા કર્મચારીઓ વાહનચાલકોને દેખાય તે માટે જેકેટ અપાશે. હાલ શહેરમાં RCC અને એલ્યુમિનિયમના બાંકડા લગાવવામાં આવ્યા છે.
માત્ર બાંકડા જ નહીં પણ ચાર પ્લાસ્ટિકની બોટલમાંથી એક જેકેટ પણ તૈયાર કરવામાં આવ્યું છે. જે રાત્રી દરમિયાન કામ કરતા શ્રમિકોને અપાશે. જેની મદદથી વાહનચાલકો સરળતાથી આ શ્રમિકોને જોઈ શકે છે. અમદાવાદ મનપાનું આયોજન છે કે પીરાણા ખાતે પ્લાસ્ટિકના અલગીકરણ કર્યા બાદ નીકળતા પ્લાસ્ટિકમાંથી વધુ બાંકડા તૈયાર કરવા જેના માટે મ્યુનિસિપલ કમિશનરની મંજૂરી મેળવવાની કવાયત હાથ ધરાઈ છે.
