અમદાવાદ: અમદાવાદના વાડજ પોલીસ સ્ટેશનમાં યુવતીએ પોતાના મંગેતર સામે દુષ્કર્મની ફરિયાદ નોંધાવી છે. મંગેતરે યુવતીની મરજી વિરુદ્ધ લગ્નની લાલચ આપીને શારીરિક સંબંધ બાંધ્યા હતા. ત્યારબાદ યુવતી ગર્ભવતી થતા મંગેતરને લગ્ન અંગે કહ્યું ત્યારે મંગેતરે લગ્ન કરવાની ના પાડી હતી. જેથી, યુવતીએ મંગેતર વિરુદ્ધમાં વાડજ પોલીસ સ્ટેશનમાં દુષ્કર્મની ફરિયાદ નોંધાવી છે.
પ્રાપ્ત રિપોર્ટ મુજબ, નવા વાડજ વિસ્તારમાં રહેતી યુવતીએ તેના મંગેતર વિરુદ્ધમાં વાડજ પોલીસ સ્ટેશનમાં પોલીસ ફરીયાદ દાખલ કરાવી છે. યુવતીની સગાઇ સમાજના રીત રિવાજ મુજબ થઇ હતી. સગાઇ બાદ યુવક યુવતીના ઘરે રહેતો હતો. અને જ્યારે પણ યુવતીના માતા પિતા ઘરે હાજર ના હોય ત્યારે યુવક શરીર સંબંધ બાંધવા માટે કહેતો હતો. જો કે યુવતી ઇન્કાર કરે તો તેને આપણે લગ્ન કરવાના છીએ કહીને અવાર નવાર તેની સાથે શારીરિક સંબંધ બાંધતો હતો.યુવક ત્રણેક મહીના બાદ તે તેના ઘરે જતો રહ્યો હતો. પરંતુ ક્યારેક તે યુવતીને મળતા માટે આવતો હતો. આ દરમિયાન યુવતીએ મેડીકલમાંથી પ્રેગનેન્સી કીટ લાવીને તપાસ કરતા જાણવા મળ્યુ હતું કે તે પ્રેગનેન્ટ છે. જેથી તેણે તેના મંગેતરને વાત કરતા તેણે ફોન કટ કરી દીધો હતો.
યુવક બાદમાં તેનો કોઇ કોન્ટેક્ટ થઇ શક્યો ન હતો. જો કે ત્યારબાદ તેઓ જ્યારે મળ્યા ત્યારે યુવતીએ ફરીથી તેની પ્રેગનેન્સી બાબતે તેમજ લગ્ન બાબતે વાત કરતા તે ઉગ્ર થઇ ગયો હતો.કહ્યું હતું કે તારો નેચર મને ગમતો નથી, તારે પ્રેગનેન્સીનું જે કરવું હોય તે કર હું તારી જોડે લગ્ન કરીશ નહીં અને જતો રહ્યો હતો. જેથી જે અંગે યુવતીએ પોલીસને જાણ કરતા પોલીસએ ફરીયાદ નોંધીને વધુ તપાસ શરૂ કરી છે.