અમદાવાદ : અમદાવાદમાં દિવાળીના તહેવારને ગણતરીના દિવસો બાકી છે ત્યારે લૂંટના બનાવને પગલે ચકચાર મચી છે. જેમાં શેલામાં એક મહિલાને ગળે છરો મૂકીની ધાક બતાવીને દાગીનાની લૂંટ ચલાવવામાં આવી હતી. શેલામાં વ્રજ હોમ્સમાં આવીને લૂંટારૂઓએ મહિલાને ધમકી આપીને કહ્યું રૂપિયા આપી દે નહીતર મારી નાખીશું તેમ કહીને લૂંટ ચલાવી હતી.રૂપિયા 4.54 લાખના સોનાના દાગીનાની લૂંટ કરવામાં આવી છે,ચોર ઘરમાંથી લૂંટ કરી ગાડી પણ લૂંટીને ત્યાંથી નાસી ગયા હતા. આ બનાવ અંગે પોલીસને જાણ કરતા પોલીસ સ્થળ પર પહોંચી હતી. બોપલ પોલીસે ગુનો નોંધી તપાસ શરૂ કરી છે.
પ્રાપ્ત રિપોર્ટ મુજબ, શેલાના વ્રજ હોમ્સમાં રહેતા ગીતાબેન પટેલે બોપલ પોલીસ સ્ટેશનમાં ફરિયાદ નોંધાવી છે કે, 18 ઓક્ટોબરના રાત્રે તેઓ નીચેના બેડરૂમમાં સૂઈ ગયા હતા. તેમના પતિ તથા દીકરો ઉપરના બેડરૂમમાં સૂઈ ગયા હતા. 19 ઓક્ટોબરના આશરે સવારે 4:45 વાગ્યાના આસપાસ તેમના ઘરની બારીની ગ્રીલ તોડી બારીમાંથી સળીયો કાઢીને પાંચ વ્યક્તિઓ ઘરમાં આવ્યા હતા. જેથી, તેઓ જાગી ગયા હતા. આ પાંચેય તેમના રૂમમાં આવ્યા હતા. જેમાંથી એક વ્યક્તિના મોઢા ઉપર શર્ટ બાંધ્યો હતો અને બાકીના 4 જણના મોઢા ઉપર રૂમાલ બાંધેલો હતો. આ પાંચેય તેમને હિન્દીમાં કહ્યું હતું કે, રૂપિયા કહા રખા હૈ અને તેમના ગળા ઉપર છરો મૂકીને તેમના કાનમાં પહેરેલી સોનાની કડી, ગળામાં પહેરેલી સોનાની ચેઈન, પગમાં પહેરેલી ચાંદીની સાંકળ કાઢી દીધી હતી.
ત્યારબાદ તેમના બેડરૂમના કબાટમાં રાખેલા સોના-ચાંદીના દાગીના,મોબાઈલ ફોનની અને રોકડ રકમની લૂંટ કરી હતી. ફક્ત એટલું જ નહીં જતા-જતા તેમણે ગાડીની ચાવી અંગે પૂછીને ગળા ઉપર છરો મૂકીને ગાડીની ચાવી પણ લઈ લીધી હતી. ત્યારબાદ તેમના પાર્કિંગમાં પાર્ક કરેલી વેન્ટો ગાડી પણ આ ચોરો લઈને જતા રહ્યા હતા .જતા જતા કહેતા ગયા હતા કે, કિસી કો બતાયા તો જાન સે માર ડાલેંગે.ચોર ગયા બાદ તેમણે તેમના પતિ અને દીકરાને જાણ કરી હતી. જેથી, તેમના પતિએ 100 નંબર પર ફોન કરીને પોલીસને બોલાવતા પોલીસ સ્થળ પર પહોંચી હતી. પોલીસે સમગ્ર મામલે સોના-ચાંદીના દાગીના તથા રોકડ રકમ સહિત કુલ 4.54 લાખની લૂંટની ફરિયાદ નોંધી તપાસ શરૂ કરી છે.
પોલીસ દ્વારા આસપાસના સીસીટીવીની પણ તપાસ કરવામાં આવી રહી છે.કોઈ જાણભેદુ એ ઘટનાને અંજામ આપ્યો હોય તેવું પોલીસને અનુમાન છે.પોલીસે રોડ પરના સીસીટીવી પણ તપાસ અર્થે લીધા છે,ત્યારે ચોરીનો ભેદ જલદીથી ઉકેલાઈ જશે તેવી પોલીસને આશા છે,હાઈવે પરથી લૂંટારૂઓ આવ્યા હોઈ શકે અને ચોરી કરીને હાઈવે તરફથી ગયા હોઈ શકે છે.