સ્ટેમ્પ ડ્યૂટી ભરનારાઓ માટે આવ્યો નવો નિયમ, સરકારે નવા બિલમાં વધારી દીધી દંડની રકમ

ગાંધીનગર : ગુજરાત વિધાનસભામાં ગુજરાત સ્ટેમ્પ અધિનિયમ બિલ રજુ કરાયું છે. એટલે કે, ગુજરાત સ્ટેમ્પ અધિનિયમ, 1958ની કલમ 62-ક (3), 9માં ઉલ્લેખિત જોગવાઈનું પાલન ન કરનાર કે સ્ટેમ્પ ડ્યુટી (Stamp Duty) વસૂૂલીને જમા કરાવવામાં નિષ્ફળ જવું અથવા ખોટી માહિતી આપવા બદલ દંડમાં વધારો ઝીંક્યો છે. રૂપિયા 200ના બદલે હવે 1 લાખ કરાતા ગુનેગારોમાં ફફડાટ ફેલાયો છે.

પ્રાપ્ત રિપોર્ટ મુજબ, ગુજરાત વિધાનસભામાં સત્ર ચાલી રહ્યું છે ત્યારે સરકારે ગુજરાત સ્ટેમ્પ અમેન્ડમેન્ટ બિલ, 2025 વિધાનસભામાં રજુ કર્યુ છે. ગુજરાત સ્ટેમ્પ અધિનિયમ 1958ની કલમ 62-ક (3) સાથે કલમ 9-એમાં દંડની રકમમાં મોટો ફેરફાર કરવામાં આવ્યો છે. જેમાં આ જોગવાઈનું પાલન ન કરનાર તથા સ્ટેમ્પ ડ્યુટી વસૂલીને સરકારમાં જમા કરાવવામાં નિષ્ફળ જનાર કે તેની ખોટી માહિતી આપનારને દંડ ફટકારવામાં આવશે. જેમાં દંડની રકમ 200 રૂપિયાથી વધારીને 1 લાખ સુધીની કરવામા આવી છે. નવી જોગવાઈઓ ઉમેરવામાં આવી છે, જે મુજબ અલગ અલગ ભૂલ કરનારને અલગ દંડની જોગવાઈ કરવામા આવી છે.

આ રીતે કરવામાં આવતો દંડ ઓછામાં ઓછો 10 હજાર રૂપિયા તો કરવો જ પડશે તેવી જોગવાઈ નવા સૂચિત સુધારા ખરડામાં દાખલ કરવામાં આવી છે. કલમ 62-ક ની 1, 2, 3 માં કરવામાં આવેલી નવી જોગવાઈ પ્રમાણે કેટલાક કિસ્સાઓમાં આ દંડની રકમ 200 થી વધારીને 50 હજાર રૂપિયા પણ કરી દેવામાં આવી છે. તેમ જ ઓછામાં ઓછી પેનલ્ટી 10 હજાર કરી દેવાની ખરડામાં જોગવાઈ કરવામાં આવી છે. આ કેસમાં જેલની સજા કરવાની સત્તા કોર્ટને છે, પરંતુ આ ખરડા મારફતે આ સત્તા સ્ટેમ્પ અધિકારીને આપી દેવામાં આવી હોવાનું જણાય છે.

મૃતકના વારસદારો માટે રાહત
મૃતકની મિલકત વારસદારોને ટ્રાન્સફર કરતી વખતે માત્ર 200 રૂપિયાના સ્ટેમ્પ પર પ્રોપર્ટી ટ્રાન્સફર કરવાની જોગવાઈ રજૂ કરવામાં આવી છે. આ નિર્ણય સામાન્ય નાગરિકો માટે રાહતરૂપ છે.

ગિરોખત મિલકત પર દંડમાં વધારો
આર્ટિકલ 36માં સુધારો કરીને ગિરોખત (માર્ગેજ) મિલકત માટે 5 હજાર રૂપિયા દંડ નક્કી કરવામાં આવ્યો છે, જે અગાઉ 500 થી 1000 રૂપિયા હતો.

સ્ટેમ્પ ડ્યૂટી પર વધુ સખ્તાઈ
1999 પહેલાં સ્ટેમ્પ ડ્યૂટી વસૂલાતી નહોતી, પરંતુ હવે 20-25 વર્ષ જૂની બાકી સ્ટેમ્પ ડ્યૂટીના કેસમાં બમણી રકમ ભરવાની ફરજ થશે. ઉદાહરણ તરીકે, જો 50 હજાર રૂપિયાની સ્ટેમ્પ ડ્યૂટી બાકી હોય, તો 1 લાખ રૂપિયા ભરવા પડશે. તેમજ દર વર્ષે 3% દંડ ઉમેરવાની જોગવાઈ પણ છે.

ભાડાં કરાર પર નવી જોગવાઈ
રહેઠાણ માટે 11 મહિના 39 દિવસના ભાડાં કરાર માટે 500 રૂપિયા અને કોમર્શિયલ માટે 1000 રૂપિયાનો સ્ટેમ્પ ફરજિયાત બનાવવામાં આવ્યો છે. જો ભાડાં કરાર પંદર વર્ષ જૂનો છે અને સ્ટેમ્પ ડ્યૂટી ભરાઈ ન હોય, તો 10 હજાર રૂપિયા અને દરેક વધતા વર્ષ માટે 2% દંડ ભરવો પડશે.

ઉલ્લેખનીય છે કે, આજે ત્રણ સરકારી વિધેયકો ગૃહમાં રજૂ થશે. ગુજરાત વિનિયોગ વિધેયક ૨૦૨૫ ગૃહમાં રજૂ થશે. ગુજરાત સ્ટેમ્પ સુધારા વિધેયક ગૃહમાં રજૂ થશે. સરકારી વિધેયકો બાદ બિન સરકારી કામકાજ હાથમાં લેવાશે.