અમદાવાદ : અમદાવાદમાં વાડજ પોલીસે એક નિર્દોષ નાગરિકને NDPSના ખોટા કેસમાં ફસાવવાના ઇરાદાને નિષ્ફળ બનાવ્યો છે. સંબંધી સાથેની જૂની અદાવતનું વેર વાળવા માટે કારમાં નશીલા પાવડરના પડીકાં મૂકી પોલીસને જાણ કરનાર બે શખસોની પોલીસે ધરપકડ કરીને કાયદેસરની કાર્યવાહી હાથ ધરી છે.
ઘટનાની વિગતે વાત કરીએ તો, આ ઘટનાની શરૂઆત 4 એપ્રિલ, 2025ના રોજ થઈ હતી. પ્રદ્યુમન લુહાર નામના શખસે પોલીસ કંટ્રોલ રૂમમાં ફોન કરીને એવી માહિતી આપી હતી કે એક ઇકો કારમાં શંકાસ્પદ પાવડરના પડીકાં પડ્યા છે. કંટ્રોલ રૂમના મેસેજને આધારે વાડજ પોલીસની ટીમ તાત્કાલિક ઘટનાસ્થળે પહોંચી હતી.પોલીસે ત્યાં પહોંચીને તપાસ કરતા ગાડીમાંથી કોઈ વસ્તુ ન મળી, જે બાદ પોલીસને બાતમી આપનાર પ્રદ્યુમન લુહાર પોતે ગાડી પાસે ગયો અને ગાડીમાં સંતાડેલ ડ્રગ્સની પડીકા કાઢીને પોલીસને આપ્યા હતા.
જે પડીકામાં ‘અલ્પ્રાઝોલમ’ (નશીલો પાવડર)ના 10 પડીકાં મળી આવ્યા હતા. બાતમી આપનાર પ્રદ્યુમન લુહાર પર પોલીસને પહેલાથી શંકા જણાતા પોલીસે તે સમયે ગાડી માલિક ગોપાલ લુહાર સામે માત્ર જાણવાજોગ દાખલ કરી હતી. જે બાદમાં તેની પૂછપરછ કરતા સામે આવ્યું કે, પોલીસે દરોડા પાડ્યા તેની ગાડીમાં સંજય લુહાર અને અન્ય એક વ્યક્તિ બેઠો હતો, જેથી સંજયને બોલાવી પૂછપરછ કરતા આરોપીનો ભાંડો ફૂટી ગયો હતો.
વાડજ પોલીસે આ મામલે ઊંડાણપૂર્વક તપાસ શરૂ કરતા ચોંકાવનારી વિગતો સામે આવી હતી. તપાસમાં બહાર આવ્યું કે, આ પાવડર અકસ્માતે મળ્યો નહોતો, પરંતુ પૂર્વ આયોજિત કાવતરાના ભાગરૂપે કારમાં મૂકવામાં આવ્યો હતો. પ્રદ્યુમન લુહારે તેના પરિચિત સંજય ઉર્ફે ડીડીઓ લુહારની મદદથી ગોપાલભાઈને જેલ ભેગા કરવા અને તેમની પ્રતિષ્ઠા ખરડવા માટે આ ખતરનાક ખેલ ખેલ્યો હતો.
પોલીસ તપાસ મુજબ, પ્રદ્યુમન અને તેના સંબંધી ગોપાલભાઈ વચ્ચે છેલ્લા ઘણા વર્ષોથી પૈસાની લેતી-દેતી બાબતે ઉગ્ર વિવાદ ચાલતો હતો. આ આર્થિક ઝઘડાએ વેરનું સ્વરૂપ ધારણ કર્યું હતું. પ્રદ્યુમને ગોપાલભાઈને ગંભીર કાયદાકીય મુસીબતમાં ફસાવવા માટે પોતાના એક મિત્રની મદદથી આ કાવતરું ઘડ્યું હોવાનું કબૂલ્યું છે.
આમ વાડજ પોલીસની સતર્કતાને કારણે NDPS એક્ટનો દુરુપયોગ થતો અટક્યો છે અને એક નિર્દોષ નાગરિક ખોટા કેસમાં ફસાતા બચી ગયો છે. હાલમાં પોલીસ એ દિશામાં તપાસ કરી રહી છે કે આરોપીઓએ આ નશીલો પદાર્થ ક્યાંથી મેળવ્યો હતો અને અગાઉ પણ કોઈને આ રીતે ફસાવ્યા છે કે કેમ.