અમદાવાદ: અમદાવાદના વાડજ વિસ્તારમાં પગારનો વિવાદ અપહરણ અને અત્યાચારમાં ફેરવાયો હોવાની ચોંકાવનારી ઘટના સામે આવી છે, જ્યાં હાઉસ કીપિંગ કંપનીમાં કામ કરતા કર્મચારીઓએ પગાર બાકી રહેતા પોતાના જ ફિલ્ડ સુપરવાઈઝરનું ફિલ્મી અંદાજમાં અપહરણ કર્યું હતું. આરોપીઓએ સુપરવાઈઝરને ગાડીમાં બેસાડી અલગ-અલગ સ્થળોએ લઈ જઈ બેરહેમીથી માર માર્યો હતો.જોકે મામલો પોલીસ સ્ટેશને પહોંચાતા હાલ વાડજ પોલીસે આ મામલે ગુનો નોંધી બે સગીર સહિત સાત આરોપીઓની ધરપકડ કરી છે.
પ્રાપ્ત વિગતો મુજબ, અમદાવાદના નવરંગપુરામાં આવેલી હાઉસ કીપિંગ કંપનીમાં ફિલ્ડ ઓફિસર તરીકે રાજ બારોટ કામ કરતો હતો.જ્યાં પિન્ટુ મકવાણા, હર્ષ અને નયન સહિતના લોકો તેની સાથે કામ કરે છે એટલે કે આ તમામ લોકોને પગાર આપવાનું કામ ફિલ્ડ ઓફિસર રાજ બારોટની જવાબદારીમાં આવે છે. જોકે છેલ્લા બે મહિનાનો પગાર ન મળ્યો હોવાના આરોપો લગાવી પિન્ટુ મકવાણા, હર્ષ અને નયન સહિત 7 કર્મચારીઓએ તેનું અપહરણની ઘટનાને અંજામ આપ્યો છે.
ઘટનાને દિવસે તારીખ 24 માર્ચ 2026 અને સાંજનો સમયે ભોગ બનનાર રાજ બારોટ ઓફિસેથી છૂટીને ઘરે જઈ રહ્યો હતો. દરમિયાન ભીમજીપુરા ચાર રસ્તા પાસે આવેલ સંજીવની હોસ્પિટલ પાસે બોલાવીને પિન્ટુ મકવાણા, હર્ષ અને નયન સહિતના સાત શખ્સોએ ભેગા મળીને એક સફેદ ક્રેટા કારમાં તેનું અપહરણ કર્યું હતું. અપહરણ કર્યા બાદ તેને ચાંદલોડિયા રેલવે સ્ટેશન પાસેની અવાવરું જગ્યાએ લઈ જવામાં આવ્યો હતો. ત્યાં આ શખ્સોએ તેને ગંભીર રીતે માર મારી તેનો મોબાઈલ પણ ઝૂંટવી લીધો હતો અને તેની પાસે માફી મંગાવી આખી ઘટનાનો વીડિયો બનાવ્યો હતો.
બાદમાં આ મામલો પોલીસ સ્ટેશને પહોંચતા વાડજ પોલીસે વિવિધ ટીમો બનાવી પિન્ટુ મકવાણા, હર્ષ અને નયન સહિતના સાત શખ્સોને પકડવા તમામ દિશામાં ચક્રોગતિમાન કર્યા હતા ત્યારે પોલીસે હાલ તમામ 7 આરોપીઓની ધરપકડ કરી લીધી છે અને તેમની પૂછપરછમાં તેઓનો પગાર બાકી હોવાને કારણે આ કૃત્યને અંજામ આપ્યું હોવાની કબૂલાત કરી છે. વાડજ પોલીસે આરોપીઓને ઘટના સ્થળે લઈ જઈ આખી ઘટનાનું રિકન્સ્ટ્રક્શન કરાવ્યું હતું.
પોલીસ પકડમાં આવેલા આ આરોપીઓનો દાવો હતો કે, છેલ્લા બે મહિનાથી તેમનો પગાર બાકી હતો. વારંવારની રજૂઆત છતાં પરિણામ શૂન્ય આવતા તેઓએ આ ખૌફનાક પ્લાન ઘડ્યો હતો. તેઓની ભોગ બનનાર રાજ બારોટ સાથે પહેલા ફોન પર ગાળાગાળી થઈ હતી અને બાદમાં તેઓએ સાથે મળીને કારમાં અપહરણ કરી આખી ઘટનાને અંજામ આપ્યો હતો.