નવી દિલ્હી : આજના સમયમાં દરેક વ્યક્તિના હાથમાં સ્માર્ટફોન છે. નાનાથી લઈને વૃદ્ધ સુધી દરેક સોશિયલ મીડિયા પર એક્ટિવ છે. જ્યાં એક તરફ સોશિયલ મીડિયાના ફાયદા છે તો બીજી તરફ તેના ગેરફાયદા પણ છે. હવે 18 વર્ષથી ઓછી ઉંમરના બાળકોને સોશિયલ મીડિયા પર એકાઉન્ટ બનાવવા માટે માતાપિતાની સંમતિ લેવી પડશે. ઈલેક્ટ્રોનિક્સ અને ઈન્ફોર્મેશન ટેક્નોલોજી મંત્રાલયે પર્સનલ ડિજિટલ ડેટા પ્રોટેક્શન એક્ટ (DPDP) નિયમો માટે ડ્રાફ્ટ નિયમો જાહેર કર્યા છે. 18મી ફેબ્રુઆરી સુધી મળેલા વાંધા-સૂચનોના આધારે બેઠકમાં ફેરફાર કરવામાં આવશે અન્યથા ચાલુ રાખવામાં આવશે.
પર્સનલ ડિજિટલ ડેટા પ્રોટેક્શન નિયમોની લાંબા સમયથી રાહ જોવાઈ રહી હતી. સરકારે હવે તૈયાર કરેલા ડ્રાફ્ટમાં નિયમોના ભંગ બદલ કોઈ શિક્ષાત્મક કાર્યવાહીનો ઉલ્લેખ નથી. હવે સરકારે નિયમો જાહેર કરવા અંગે લોકો પાસેથી અભિપ્રાય માંગ્યો છે. આ અંગે અંતિમ નિર્ણય 18 ફેબ્રુઆરી પછી લેવામાં આવશે. જેમાં લોકોના અભિપ્રાયને ધ્યાને લેવામાં આવશે. આ સાથે નિયમોનું પાલન ન કરનાર કંપનીઓ પર દંડ પણ ફટકારવામાં આવશે.
આ નોટિફિકેશનમાં જણાવ્યા અનુસાર પર્સનલ ડિજિટલ ડેટા પ્રોટેક્શન એક્ટ-2023 ની કલમ 40ની પેટા-કલમ (1) અને (2) ની સત્તાનો ઉપયોગ કરીને કેન્દ્ર સરકારે અધિનિયમ લાગુ થયાની તારીખ અથવા ત્યારબાદ બનાવવામાં આવનાર સૂચિત નિયમોનો ડ્રાફ્ટ લોકોની જાણકારી માટે જાહેર કર્યો છે. તેમાં કહેવામાં આવ્યું છે કે, આ ડ્રાફ્ટ નિયમો પર 18 ફેબ્રુઆરી 2025 પછી વિચારણા કરવામાં આવશે. આ નિયમમાં ડેટા ફિડ્યુશિયરી પર 250 કરોડ રૂપિયા સુધીનો દંડ લગાવવાની જોગવાઈ છે.
હવે 18 વર્ષથી ઓછી ઉંમરના બાળકો માટે સોશિયલ મીડિયા પર એકાઉન્ટ ખોલવા માટે તેમના માતાપિતાની સંમતિ લેવી ફરજિયાત રહેશે. આ જોગવાઈ ડિજિટલ પર્સનલ ડેટા પ્રોટેક્શન એક્ટ, 2023ના ડ્રાફ્ટ નિયમોમાં સામેલ છે, જે શુક્રવારે કેન્દ્ર સરકાર દ્વારા બહાર પાડવામાં આવી. તેનો ઉદ્દેશ્ય ડિજિટલ વ્યક્તિગત ડેટાના રક્ષણ માટે કાયદાકીય માળખાને મજબૂત કરવાનો છે.
