અમદાવાદ : અમદાવાદની 14 વર્ષની દીકરી માહી ભટ્ટ અંતરિક્ષ વિજ્ઞાનના ક્ષેત્રમાં ભારતની શાન વધારી છે. માહીએ છેલ્લા 6 મહિનાની અંદર વિવિધ સ્પેસ એજન્સીની જુનિયર સાયટીસ્ટની પરીક્ષા પાસ કરી છે. જે બાદ અમેરિકન અંતરિક્ષ સંશોધન સંસ્થા-NASAએ માહીને રોકેટ લોન્ચિંગ પ્રોગ્રામ માટે આમંત્રણ આપ્યું છે.
પ્રાપ્ત રિપોર્ટ મુજબ, અમદાવાદના વસ્ત્રાલની શારદાબા સ્કૂલમાં અભ્યાસ કરતી માહી ભટ્ટે અત્યાર સુધીમાં ઈસરો (ISRO), નાસા (NASA) અને યુરોપિયન સ્પેસ એજન્સી, ઓસ્ટ્રેલિયા સ્પેસ એજન્સી, યુએઈ સ્પેસ એજન્સી સહિતની 50 જેટલી નામાંકિત સંસ્થાઓની ‘જૂનિયર સાયન્ટિસ્ટ’ પરીક્ષામાં સફળતા પ્રાપ્ત કરી છે. નાસાના ‘સ્ટેમ (STEM) એટલે કે સાયન્સ, ટેક્નોલોજી, એન્જીનીયરિંગ અને મેનેજમેન્ટ પ્રોગ્રામ’માં શ્રેષ્ઠ પ્રદર્શનના આધારે માહીને અમેરિકાનું તેડું આવ્યું છે.
અમેરિકી સ્પેસ એજન્સી NASA દ્વારા માહીને વર્ચ્યુઅલ પાસપોર્ટ અને બોર્ડિંગ પાસ પણ ફાળવી દેવામાં આવ્યા છે, ત્યારે ભારતની આ દીકરી ટૂંક સમયમાં અમેરિકામાં નાસાના હેડક્વાર્ટર ખાતે રોકેટ લોન્ચિંગની સાક્ષી બની ઇતિહાસ રચશે. આ ક્ષણ ફક્ત મહિના પરિવાર કે અમદાવાદ માટે જ નહિ પણ સમગ્ર દેશ માટે ગર્વની ક્ષણ બનશે.
અગાઉ ભારતની એક દીકરી કલ્પના ચાવલા NASA ના પ્રોજેકટ હેઠળ અંતરિક્ષમાં જઈ આવી છે. તે બાદ ભારતીય મૂળની સુનિતા વિલિયમ્સે પણ ભારતનું નામ વિશ્વ ફલક પર રોશન કર્યું છે, ત્યારે હવે માહી ભટ્ટને NASA નું તેડું આવ્યું છે. સામાન્ય પરિવારમાંથી આવતી 14 વર્ષની માહીએ સાબિત કર્યું છે કે જ્ઞાનની ભૂખ હોય તો આસપાસના પરિબળો અવરોધરૂપ બની શકતા નથી.
અમદાવાદની માહીની સિદ્ધિનું કદ કેટલું મોટું છે તે આ આંકડા પરથી જાણી શકાય છે. નાસા દ્વારા આયોજિત આ પરીક્ષામાં વિશ્વભરમાંથી કુલ ૬ લાખ જેટલા વિદ્યાર્થીઓએ ભાગ લીધો હતો. આટલી મોટી સંખ્યામાંથી, ભારતમાંથી પસંદગી પામનારી માહી ભટ્ટ એકમાત્ર વિદ્યાર્થિની બની છે. લાખોની ભીડમાં પોતાની આગવી ઓળખ ઊભી કરીને તેણે સાબિત કર્યું છે કે ગુજરાતની દીકરીઓ વિશ્વના ફલક પર પણ શ્રેષ્ઠ છે.