અમદાવાદ : અમદાવાદમાં સોમવારે બપોરે લગભગ 2:15 કલાકે વૈષ્ણોદેવી ચાર રસ્તા અને ઝૂંડાલ સર્કલની વચ્ચે મિક્સર ટ્રકની નીચે ચગદાઈ જતાં બાઈક સવાર યુવકનું કમકમાટી ભર્યું મોત થયું છે. મિક્સર ટ્રકના ટાયરની નીચે આશરે 25 મીટર સુધી યુવક ઢસેડાયો હતો. જેથી શરીરના અંગો બહાર આવી ગયા હતા. હાજર તમામ લોકો અકસ્માતના દ્રશ્યો જોઈ હેબતાઈ ગયા હતા. આ મામલે એલ ડિવિઝન ટ્રાફિક પોલીસે ગુનો નોંધવાની તજવીજ હાથ ધરી છે.
પ્રાપ્ત રિપોર્ટ મુજબ, નરોડા SRP કેમ્પસ પાસે આવેલી અમરદીપ પાર્ક સોસાયટીમાં રહેતા અજીત નાંદે (ઉ. વ. 50) ગુજરાત ATSમાં આસિસ્ટન્ટ સબ ઇન્સ્પેક્ટર (ASI) તરીકે ફરજ બજાવતા હતા. આજે 2 ફેબ્રુઆરીના રોજ બપોરે તેઓ એસપી રીંગ રોડ પર વૈષ્ણવદેવીથી ઝુંડાલ તરફ જતાં હતા ત્યારે ત્રાગડ અંડરપાસ પાસેથી સર્વિસ રોડ પરથી એક એકિટવા ચાલક મુખ્ય રોડ પર આવ્યો હતો. ત્યારે ASI અજીત નાદેનાના બાઇક સાથે ટક્કર થઈ હતી.
ત્યારે રિંગ રોડ પરથી આવતાં મિક્સર ટ્રકની પાછળના ભાગે અડફેટે આવી ગયા અને પાછળના ટાયરમાં આવી જતાં 25 મીટર ઘસડાયા હતા અને તેઓનું ઘટનાસ્થળે મોત થયું હતું. આ મામલે એલ ડિવિઝન ટ્રાફિક પોલીસને જાણ થતા પોલીસ ઘટનાસ્થળે પહોંચી હતી. આ મામલે પોલીસે ગુનો નોંધવાની તજવીજ હાથ ધરી છે.