અમદાવાદ : ગુજરાત સરકારના મહેસૂલ વિભાગ દ્વારા તાજેતરમાં એક મહત્વનું જાહેરનામું બહાર પાડવામાં આવ્યું છે, જે મુજબ હવે રાજ્યમાં દસ્તાવેજોના ઈ-રજીસ્ટ્રેશન (e-Registration) માટે નવી ફી નિર્ધારિત કરવામાં આવી છે. ગુજરાત સરકાર દ્વારા રજીસ્ટ્રેશન એક્ટ, 1908ની કલમ 78 હેઠળ મળેલી સત્તાનો ઉપયોગ કરીને આ નિર્ણય લેવામાં આવ્યો છે. આ નવો નિયમ ૨ ફેબ્રુઆરી, 2026થી અમલી બન્યો છે, જેનો મુખ્ય હેતુ ઓનલાઈન નોંધણી પ્રક્રિયાને વધુ વ્યવસ્થિત બનાવવાનો છે.
આ જાહેરનામા મુજબ, વર્ષ 1987ના જૂના ફી સ્ટ્રક્ચરમાં સુધારો કરીને ફી ટેબલમાં ક્રમાંક 29 તરીકે “ઈ-રજિસ્ટ્રેશન માટે પ્રોસેસિંગ ફી” નામે નવો આર્ટિકલ ઉમેરવામાં આવ્યો છે. જેમાં સ્પષ્ટ કરવામાં આવ્યું છે કે દરેક ઈ-રજિસ્ટ્રેશન દસ્તાવેજ માટે 100 ફી વસૂલવામાં આવશે.આ ફી દરેક ઈ-ફાઈલ થયેલા દસ્તાવેજ પર લાગુ પડશે, જેનો હેતુ ડિજિટલ નોંધણીની વહીવટી પ્રક્રિયાને ટેકો આપવાનો છે.
રાજ્ય સરકારના મહેસૂલ વિભાગ દ્વારા જારી કરાયેલા આ નોટિફિકેશનમાં સ્પષ્ટ કરવામાં આવ્યું છે કે આ સુધારો તાત્કાલિક અસરથી અમલમાં આવશે. હવેથી જે નાગરિકો ઘરબેઠા અથવા ઓનલાઈન માધ્યમથી દસ્તાવેજની નોંધણી કરાવશે, તેમને નિયત નોંધણી ફી ઉપરાંત આ 100 રૂપિયાની વધારાની પ્રોસેસિંગ ફી ભરવી પડશે. આ નિર્ણયથી રાજ્યમાં ડિજિટલ ગવર્નન્સ અને ઈ-રજીસ્ટ્રેશનની સુવિધાને વધુ વેગ મળશે.