અમદાવાદ : અમદાવાદના સરખેજ વિસ્તારમાં આજે એક હૃદયદ્રાવક અકસ્માતની ઘટના સામે આવી છે. રોયલ અકબર ટાવર પાસે પૂરપાટ ઝડપે આવી રહેલા એક ડમ્પરે મોપેડ સવાર યુવકને જોરદાર ટક્કર મારતા તેનું ઘટનાસ્થળે જ કમકમાટીભર્યું મોત નીપજ્યું છે.લોકોનાં ટોળેટોળા ઘટના સ્થળે ઉમટી પડ્યાં હતા.બનાવ અંગે જાણ થતાં એમ ડિવિઝન ટ્રાફિક-પોલીસે સ્થળ પર પહોંચી તપાસ હાથ ધરી છે.
પ્રાપ્ત રિપોર્ટ મુજબ, ફતેવાડી વિસ્તારમાં રહેતો મુસ્તકીમ નામનો 22 વર્ષનો યુવક સવારના સમયે મોપેડ લઈને જુહાપુરાના રોયલ અકબર ટાવર પાસેથી જઈ રહ્યો હતો ત્યારે પાછળથી પૂર ઝડપે નંબરપ્લેટ વિનાનું ડમ્પર આવી રહ્યું હતું. આ ડમ્પરે મુસ્તકીમને ટક્કર મારી હતી. ટક્કર વાગતાં મુસ્તકીમ જમીન પર પટકાયો હતો, જેના કારણે તેને માથા અને શરીરના ભાગે ગંભીર ઇજાઓ પહોંચી હતીઅને ઘટનાસ્થળે જ તેનું પ્રાણપંખેરું ઉડી ગયું હતું. અકસ્માત થતાની સાથે જ આસપાસના લોકોના ટોળેટોળા ઘટનાસ્થળે ઉમટી પડ્યા હતા. સ્થાનિકો દ્વારા તાત્કાલિક 108 એમ્બ્યુલન્સને જાણ કરવામાં આવી હતી, પરંતુ મેડિકલ ટીમે તપાસ બાદ યુવકને મૃત જાહેર કર્યો હતો.
ઘટનાની જાણ થતા જ પોલીસનો કાફલો સ્થળ પર પહોંચી ગયો હતો. એમ ડિવિઝન ટ્રાફિક-પોલીસે મામલાની ગંભીરતા જોઈને યુવકના મૃતદેહને કબજે કરી પોસ્ટમોર્ટમ અર્થે હોસ્પિટલ ખસેડ્યો છે. ડમ્પર ચાલક વિરુદ્ધ અકસ્માતનો ગુનો દાખલ કરવાની તજવીજ હાથ ધરી છે. સીસીટીવી ફૂટેજ અને પ્રત્યક્ષદર્શીઓના આધારે વધુ તપાસ શરૂ કરી છે. ઉપરાંત ડમ્પર ચાલકને પકડવા માટે પણ ચક્રોગતિમાન કર્યા છે.
સ્થાનિકોનું કહેવું છે કે અગાઉ પણ રજૂઆત કરી હતી છતાં પણ દિવસ દરમિયાન ભારે વાહનોને પસાર થવા દેવામાં આવે છે, એના કારણે જ આ અકસ્માત થયો છે.દિવસ દરમિયાન ભારે વાહનો જુહાપુરા જેવા ગીચ વિસ્તારમાંથી પસાર થતાં સ્થાનિકોમાં રોષ જોવા મળ્યો હતો.