અમદાવાદ : વૈષ્ણોદેવી સર્કલથી ઝુંડાલ સર્કલને જોડતા રિંગ રોડ પર આવેલી હોટલ હિલ્લોક સામેનો કટ છેલ્લા કેટલાક સમયથી બંધ કરી દેવાયો છે. બંધ કરેલો કટ ખોલવા સ્થાનિકોએ અનેક વાર રજુઆત કરી છે છતાં કટ ખોલવામાં ન આવતા રહીશોએ કંટાળીને ભેગા થઇને રોડ બ્લોક કરી દીધો હતો.અહીં વિરોધ કરનાર 100થી 150 લોકોએ વોટ્સએપ ગ્રૂપ બનાવીને ગેરકાયદે મંડળી રચીને સરકારી મિલકતને નુકસાન કર્યાની ફરિયાદ નોંધી પોલીસે તપાસ હાથ ધરી છે.
પ્રાપ્ત રિપોર્ટ મુજબ, ગત તા.7 ફેબ્રુઆરીએ પણ ટોળાએ આ જ પ્રકારે વિરોધ કરીને સરકારી બેરીકેડ તોડીને નુકસાન પહોંચાડ્યુ હતું. જે બાદ ગત તા. 21 ફેબ્રુઆરીએ પણ આ રીતે વિરોધ કર્યો હતો. મામલો ઉચ્ચ અધિકારીઓ સુધી પહોંચતા આખરે પોલીસે આ તત્ત્વોને શોધી કાઢવા કવાયત તેજ કરી હતી. દરમિયાનમાં આનંદ આઇ લાઇફ સોસાયટીમાં રહેતા રહીશની પોલીસે પૂછપરછ કરતા તેણે 26 સોસાયટીના મેમ્બરોનું નેબર્સ ન્યૂ ત્રાગડ ગ્રૂપ હોવાની કબૂલાત કરી હતી. આ ગ્રૂપમાં રહેલા લોકોએ કટ ખોલવા અંગે વિરોધ કરીને ગેરકાયદે મંડળી રચીને રોડ બ્લોક કરીને વાહનો રોકાવીને અવરોધ ઉભો કરીને સરકારી મિલકતને નુકસાન પહોંચાડ્યુ હોવાનું સામે આવતા પોલીસે ગુનો નોંધી તપાસ હાથ ધરી છે.
પોલીસે તપાસ કરતા આ ગ્રૂપમાં રહેલા લોકોએ કટ ખોલવા અંગે વિરોધ કરીને ગેરકાયદે મંડળી રચીને રોડ બ્લોક કરીને વાહનો રોકાવીને અવરોધ ઉભો કરીને સરકારી મિલકતને નુકસાન પહોંચાડ્યુ હતું. જેથી, પોલીસે ગુનો નોંધી તપાસ હાથ ધરી છે. પોલીસે આ ટોળા પૈકી જીગર ગજ્જર, વિરાજ મેવાડા, ગુંજન, કિશન કંસાગરા, ચિંતન જોષી, રાહુલ પટેલ, મોહબત ગઢવીની ઓળખ કરી કાર્યવાહી કરવા તજવીજ હાથ ધરી છે.