અમદાવાદ : શહેરના ઘાટલોડિયા વિસ્તારમાં આવેલી જ્ઞાનદા ગર્લ્સ ઉચ્ચત્તર માધ્યમિક શાળા દ્વારા આજે એક પ્રેરણાદાયી ‘પર્યાવરણ બચાવો’ રેલીનું સફળ આયોજન કરવામાં આવ્યું હતું. ઐતિહાસિક દાંડીયાત્રાની સ્મૃતિમાં યોજાયેલી આ રેલીમાં પર્યાવરણ જાળવણીનો સંદેશ વહેતો કરવામાં આવ્યો હતો.
પ્રાપ્ત રિપોર્ટ મુજબ, જ્ઞાનદા ગર્લ્સ ઉચ્ચત્તર માધ્યમિક શાળા દ્વારા યોજાયેલ આ રેલીમાં શાળાની આશરે 500 જેટલી વિદ્યાર્થિનીઓ અને વાલીઓ ઉત્સાહભેર જોડાયા હતા.આ રેલીમાં વિદ્યાર્થિનીઓએ હાથમાં પર્યાવરણલક્ષી સૂત્રો લખેલા કાર્ડ-બોર્ડ પ્લેકાર્ડ્સ રાખ્યા હતા અને દેશભક્તિના ગીતો તેમજ સૂત્રોચ્ચાર દ્વારા સમગ્ર વાતાવરણને ગજવી દીધું હતું. આ રેલી સમગ્ર વિસ્તારમાં અંદાજે 2 કિમી જેટલા અંતરમાં યોજવામાં આવી હતી.
આ રેલી બાદ પર્યાવરણની સુરક્ષાના ભાગરૂપે, રોટરી ક્લબ ઓફ અમદાવાદ સૂર્યોદયના વિશેષ સહયોગથી તમામ વિદ્યાર્થિનીઓને નિઃશુલ્ક કોટન બેગ (કાપડની થેલી) એનાયત કરવામાં આવી હતી. આ તકે વિદ્યાર્થીઓને પ્લાસ્ટિકનો ત્યાગ કરી કોટન બેગના ઉપયોગ અને તેના ફાયદાઓ વિશે વિસ્તૃત સમજણ આપવામાં આવી હતી.
સ્થાનિક વાલીઓ અને નાગરિકો તરફથી આ રેલીને ખૂબ જ સારો પ્રતિસાદ સાંપડ્યો હતો. શાળાના આચાર્યશ્રી દ્વારા આ સુંદર આયોજન બદલ સૌનો આભાર વ્યક્ત કરવામાં આવ્યો હતો.