અમદાવાદ : શહેરના નિકોલ વિસ્તારમાં કાર ચાલકે અકસ્માત સર્જાયો હતો. જે બાદ અકસ્માત સર્જનાર કાર ચાલકને એક વૃદ્ધ સમજાવવા જતા કાર ચાલકે વૃદ્ધને કારના બોનેટ પર બેસાડી કાર દોડાવી હોવાનો વીડિયો પણ સોશિયલ મીડિયામાં વાયરલ થયો છે. વીડિયોમાં વૃદ્ધ કાર ચાલકને કહે છે કે હું કેસ કરવાનો નથી. તેમ છતાં કાર ચાલક પોતાની કાર ઉભી રાખવાની જગ્યાએ પુરપાટ દોડાવતો વીડિયોમાં જોઈ શકાય છે. સમગ્ર ઘટનાનો વીડિયો સોશિયલ મીડિયામાં વાયરલ થતાં પોલીસ તાત્કાલિક હરકતમાં આવી હતી.
આ સમગ્ર ઘટનાનો વીડિયો સ્થળ પર હાજર લોકોએ પોતાના મોબાઈલ ફોનમાં કેદ કર્યો હતો. વીડિયો સોશિયલ મીડિયામાં વાયરલ થતાં મામલો ગંભીર બન્યો હતો. વીડિયો વાયરલ થતા જનતા ભડકી હતી અને ત્યારબાદ અમદાવાદ ટ્રાફિક પોલીસ તાત્કાલિક હરકતમાં આવી અને વાયરલ વીડિયોના આધારે તપાસ શરૂ કરી હતી. તપાસ દરમિયાન અકસ્માત સર્જનાર કારનો નંબર GJ 13 CB 2908 હોવાનું સામે આવ્યું હતું. આ કાર આઈ10 નિયોસ મોડેલની હોવાનું પણ જાણવા મળ્યું હતું. પોલીસે કાર ચાલકની ઓળખ કરી તેની સામે કાયદેસરની કાર્યવાહી હાથ ધરી હતી.
પ્રાપ્ત રિપોર્ટ મુજબ, વાયરલ થયેલા વીડિયોના આધારે આઈ ડિવિઝન ટ્રાફિક પોલીસે આરોપીની સામે ગુનો નોંધવાની કાર્યવાહી હાથ ધરી હતી.આ મામલે રાતે પોલીસ સ્ટેશનમાં ભયજનક ડ્રાઇવિંગની કલમ બીએનએસ (BNS) 281 મુજબ અને એમવી એક્ટ (MV Act) 184, 177, 134 મુજબ ગુનો દાખલ કરવામાં આવ્યો છે.અને આરોપી ડ્રાઈવર જાદવ હરિસિંહ સુરસંગની અટકાયત કરવામાં આવી છે.પોલીસ તપાસમાં આરોપીની ઓળખ જાદવ હરિસિંહ સુરસંગ તરીકે થઈ છે. આરોપી મૂળ સુરેન્દ્રનગર જિલ્લાના વઢવાણનો રહેવાસી છે અને હાલમાં અમદાવાદના વિરાટનગર વિસ્તારમાં રહે છે.