લોકસભા ચૂંટણીની તારીખો જાહેર : 7 તબક્કામાં મતદાન, ગુજરાતમાં ક્યારે થશે મતદાન થશે, અહીં જાણી લો તમામ વિગતો

નવી દિલ્હી : દેશમાં લોકસભા ચૂંટણીનું બ્યુગલ વાગી ગયું છે. ચૂંટણી પંચે લોકસભા ચૂંટણીની તારીખ જાહેર કરી દીધી છે. મુખ્ય ચૂંટણી કમિશનર દિલ્હીના વિજ્ઞાન ભવનમાં પ્રેસ-કોન્ફરન્સ કરી રહ્યા છે. લોકસભાની ચૂંટણી સાત તબક્કામાં યોજાશે. પ્રથમ તબક્કો 19 એપ્રિલથી શરૂ થશે બીજા તબક્કાનું મતદાન 26 એપ્રિલે થશે.અને તમામ સાત તબક્કાના મતદાન બાદ 4 જૂને ચૂંટણી પરિણામો જાહેર કરવામાં આવશે.

લોકસભા ચૂંટણીમાં કુલ સાત તબક્કામાંથી ગુજરાતમાં 26 બેઠકો પર 7મીમેએ ત્રીજા તબક્કાનું મતદાન યોજાશે. તેના માટેનું નામાંકન ત્રીજી મે સુધીમાં થશે. ગુજરાતમાં ફોર્મ ભરવાની છેલ્લી તારીખ 19 એપ્રિલ છે, 20 એપ્રિલે ફોર્મની ચકાસણી થશે અને પરત ખેંચવાની અંતિમ તારીખ 22 એપ્રિલ છે. ગુજરાત સહિતની તમામ બેઠકો પર પરિણામ ચાર જૂનના રોજ જાહેર થશે.

મુખ્ય ચૂંટણી કમિશનર રાજીવ કુમારે જણાવ્યું હતું કે આ ચૂંટણીમાં પ્રથમ વખત 1.8 કરોડ મતદારો મતદાન કરશે. 100 વર્ષથી વધુ ઉંમરના 2.18 લાખ મતદારો છે. 18 થી 29 વર્ષની વયજૂથમાં 21.5 કરોડ યુવા મતદારો છે. દેશના 12 રાજ્યોમાં પુરૂષો કરતા મહિલા મતદારોની સંખ્યા વધુ છે. 48,000 ટ્રાન્સજેન્ડર મતદારો છે. જેમાં 49 કરોડ પુરૂષ અને 48 કરોડ મહિલા મતદારો છે.

લોકસભાની સાથે જ 4 રાજ્ય – આંધ્રપ્રદેશ, ઓડિશા, અરુણાચલ પ્રદેશ અને સિક્કિમની વિધાનસભા ચૂંટણીની તારીખો પણ આજે જાહેર કરવામાં આવી. ચૂંટણીપંચે લોકસભા અને ચાર વિધાનસભા ચૂંટણી માટે 3.4 લાખ કેન્દ્રીય દળોની માગણી કરી છે. આયોગ 97 કરોડ મતદારો માટે દેશભરમાં લગભગ 12.5 લાખ મતદાન મથકો બનાવી શકે છે.