Assembly Election Results : દેશમાં રાજસ્થાન અને મધ્યપ્રદેશ સહિત ચાર રાજ્યોમાં આજે મતગણતરીનો પ્રારંભ થયો છે. તેમાં હાલના તબક્કે મધ્યપ્રદેશમાં ભાજપ આગળ જણાય છે જ્યારે રાજસ્થાન અને છત્તીસગઢમાં ભાજપ અને કોંગ્રેસ વચ્ચે રસાકસી છે. તેલંગણામાં હાલમાં કોંગ્રેસ મજબૂત દેખાય છે. મિઝોરમમાં આજે મતગણતરી કરવામાં નથી આવી. ઈશાન ભારતના આ રાજ્યમાં સોમવારે મતગણતરી થશે.
હાલનો ટ્રેન્ડ શું કહે છે? સવારના 10.45 વાગ્યાના આંકડા પ્રમાણે
મધ્ય પ્રદેશમાં 230 બેઠકોમાંથી મોટા ભાગની બેઠકોના આંકડા આવી રહ્યા હતા. તેમાં ભાજપ 144 બેઠક પર અને કોંગ્રેસ 83 બેઠક પર આગળ હતી. જયારે અન્યો ત્રણ બેઠક પર આગળ હતા. મધ્ય પ્રદેશમાં બહુમતિ માટે 116 બેઠક જીતવી જરૂરી છે.
રાજસ્થાનમાં 199 બેઠકોમાંથી 199 બેઠકના રુઝાન આવ્યા હતા જેમાં બહુમતી મેળવવા માટે 100 બેઠકો જરૂરી છે. રાજસ્થાનમાં અત્યારે 116 બેઠકો પર ભાજપ આગળ છે એટલે કે ભાજપને સારો એવો ફાયદો થઈ રહ્યો છે. જ્યારે કોંગ્રેસ 67 બેઠકો પર આગળ છે. અન્યને 16 બેઠક પર સરસાઈ દેખાય છે.
છત્તીસગઢમાં 90 બેઠકો છે જેમાંથી 90 બેઠકોના રુઝાન મળ્યા છે. છત્તીસગઢમાં બહુમતી મેળવવા માટે 46 બેઠકો જરૂરી હોય છે. હાલમાં 51 બેઠકો પર ભાજપ અને 37બેઠકો પર કોંગ્રેસ આગળ છે. અન્યને 2 બેઠક પર સરસાઈ દેખાય છે.
તેલંગણામાં કોંગ્રેસ જોરદાર દેખાવ કરીને 65 બેઠકો પર આગળ છે જ્યારે બીઆરએસ 45 બેઠકો પર આગળ છે. ભાજપને 4 બેઠકો પર સરસાઈ મળતી દેખાય છે. તેલંગણામાં 119 બેઠકો છે.
મિઝોરમમાં મત ગણતરી કેમ નથી?
વિધાનસભાની ચૂંટણી પાંચ રાજ્યોમાં થઈ હતી જેમાં મિઝોરમ પણ સામેલ હતું. પરંતુ મિઝોરમમાં મતગણતરી 4 ડિસેમ્બરે કરવામાં આવશે. મિઝોરમમાં ખ્રિસ્તી બહુમતી છે અને તેમના માટે રવિવાર મહત્ત્વનો દિવસ હોવાથી મતગણતરી સોમવારે થશે.
