અમદાવાદમાં પતિએ પત્નીને સરાજાહેર છરીના ઘા ઝીંક્યા, 75 ટાંકા આવ્યા, 2024માં જ કર્યા હતા પ્રેમ લગ્ન

અમદાવાદ : અમદાવાદના નિકોલ વિસ્તારમાં ખોડિયારનગર પાસે આવેલી દૂધ સાગર ડેરી નજીક સોમવારે મોડી રાત્રે ચોંકાવનારી ઘટના બની હતી. પતિએ તેની 27 વર્ષીય પત્ની પર જાહેરમાં છરી વડે હુમલો કર્યો હતો, જેના કારણે મહિલા ગંભીર રીતે ઘાયલ થઈ છે. આ સમગ્ર ઘટના સીસીટીવી કેમેરામાં કેદ થઈ ગઈ હતી. જેના આધારે પોલીસે તાત્કાલિક કાર્યવાહી હાથ ધરી છે.

પ્રાપ્ત રિપોર્ટ મુજબ, આરોપીની ઓળખ મયંક પટેલ તરીકે થઈ છે. સોમવારે સાંજે પતિ મયંકે પત્નીને વાળ પકડીને જાહેર રોડ પર ઢસડી હતી અને બાદમાં ગળામાં તેમજ શરીર પર ઉપરાછાપરી છરીના ઘા માર્યા હતા. હુમલા સમયે ત્રણ વ્યક્તિએ વચ્ચે પડીને છોડાવવાનો પ્રયાસ કર્યો છતાં પતિએ પત્નીને છોડી નહોતી અને મારતો રહ્યો હતો. હાલમાં યુવતીની અસારવા સિવિલ હોસ્પિટલમાં સારવાર ચાલી રહી છે અને તેની સ્થિતિ સ્થિર છે. તબીબોએ ગળા-ખભાના ભાગે 75 ટાંકા લીધા હતા.

આ યુવતીએ આશરે દોઢ-બે વર્ષ પહેલા પ્રેમલગ્ન કર્યા હતા અને સાથે રહેતા હતા. જોકે, સાસરિયા પક્ષના કથિત ત્રાસને કારણે મહિલા છેલ્લા ચાર મહિનાથી તેના પિયરમાં રહેવા ચાલી ગઈ હતી. પીડિત મહિલાએ અગાઉ પણ તેના પતિ અને સાસરિયાઓ વિરુદ્ધ માનસિક અને શારીરિક ત્રાસ આપવાની ફરિયાદો નોંધાવી હતી. ઘટનાના દિવસે મહિલા કોઈ અંગત કામે બહાર નીકળી હતી. તે સમયે પતિએ તેને રોકી હતી અને તેના પર તૂટી પડ્યો હતો. છરીના ઘાના કારણે સ્થળ પર લોહીનાં ખાબોચિયાં ભરાઈ ગયાં હતાં.

બે વર્ષ પહેલાં કૃષ્ણનગર ખાતે રહેતો યુવક પીડિત યુવતીના ઘરે આવ્યો હતો. યુવકની માતા ટૂરનું કામ કરતી હોવાથી તે અવારનવાર યુવતીના ઘરે આવતી હતી. યુવકે યેન કેન પ્રકારેણ યુવતીનો મોબાઈલ નંબર મેળવી લીધો હતો અને ફોન પર વાતો કરવાની શરૂ કરી હતી. જોતજોતાંમાં યુવક અને યુવતી વચ્ચે પ્રેમ થઈ જતાં તેમને 29 જાન્યુઆરી, 2024ના રોજ પ્રેમલગ્ન કરી લીધા હતા. પ્રેમલગ્ન કર્યા બાદ યુવતી સાસરીમાં રહેવા માટે જતી રહી હતી. યુવતીને એક વર્ષ સુધી સાસરિયાંએ સારી રીતે રાખી હતી, પરંતુ બાદમાં નાની-નાની બાબતે મેણાટોણા મારવાના શરૂ કરી દીધા હતા.

સાસરિયા યુવતીને એટલી હદ સુધી માનસિક ત્રાસ આપતા હતા તે સમગ્ર હકીકત તેના પતિને કહી દેતી હતી. પતિ પણ પત્નીનો સાથ ન આપીને તેની સાથે મારઝૂડ કરતો હતો. એક સમયે યુવતી પર હુમલો કરીને સાસરિયાંએ તેને ઘરમાંથી કાઢી મૂકી હતી.યુવતીએ જણાવ્યું હતું કે મારા પતિને છૂટાછેડા આપવા હતા, પરંતુ મેં ના પાડી હતી, જેથી મારા પતિએ મારા પર પાછળથી હુમલો કર્યો હતો. એ બાદ મારું ગળું કાપી નાખ્યું હતું. લોકોએ મને છોડાવી હોસ્પિટલ મોકલી હતી.